నాగార్జున‌.. ఈ టైటిల్ తెలుగు వాళ్ల‌కు ఎక్కుతుందా?

నాగార్జున త‌దుప‌రి సినిమాకు సంబంధించి ఫ‌స్ట్ లుక్ తో పాటు టైటిల్ ను కూడా విడుద‌ల చేశారు. వైవిధ్య‌భ‌రిత‌మైన సినిమాల‌ను చేసేందుకు మొద‌టి నుంచి ఆస‌క్తి చూపుతున్న నాగార్జున ఈ సారి మ‌రింత వైవిధ్య‌మైన టైటిల్ తో కూడా వ‌చ్చారు. ఆ సినిమా పేరు 'వైల్డ్ డాగ్'!

అషిహోర్ స‌ల్మాన్ డైరెక్ష‌న్లో ఈ సినిమా రూపొందుతూ ఉంది. కొత్త ద‌ర్శ‌కుల‌తో, వైవిధ్య‌భ‌రిత‌మైన కాన్సెప్ట్ ల‌తో సినిమాలు చేసే నాగార్జున ఇలా మ‌రో ప్ర‌యోగం చేస్తూ ఉన్నారు. ఇందులో నాగ్ విజ‌య్ వ‌ర్మ అనే ఎన్ కౌంట‌ర్ స్పెష‌లిస్ట్ పాత్ర‌లో క‌నిపించ‌బోతున్నార‌ని స్ప‌ష్టం అవుతోంది. ఈ మేర‌కు ఫ‌స్ట్ లుక్ తోనే క్లారిటీ ఇచ్చారు.

ఈ మ‌ధ్య‌నే రామ్ గోపాల్ వ‌ర్మ ద‌ర్శ‌క‌త్వంలో ఆఫీస‌ర్ అనే సినిమాలో న‌టించి నాగ్ చేతులు కాల్చుకున్నారు. ఆ సినిమాను నాగార్జున కూడా పూర్తిగా చూసి ఉండ‌క‌పోవ‌చ్చ‌నే అభిప్రాయాలు వినిపించాయి. అయితే ఇప్పుడు కొత్త ద‌ర్శ‌కుడు నాగ్ హిట్ లోటును భ‌ర్తీ చేస్తాడేమో చూడాల్సి ఉంది.

ఆ సంగ‌త‌లా ఉంటే.. ఎటొచ్చీ వైల్డ్ డాగ్ అనే ఈ టైటిల్ తెలుగు మాస్ ఆడియ‌న్స్ కు ఎంత వ‌ర‌కూ ఎక్కుతుందో చూడాల్సి ఉంది. వేరే భాష‌ల టైటిల్స్ తెలుగులో కొత్త‌వేమీ కావు. అయితే.. మ‌రీ ఇలా అట‌వి కుక్క‌ అని అర్థం వ‌చ్చేలా ఈ టైటిల్ ను ఇంగ్లిష్ లో పెట్టారు. ఎన్ కౌంట‌ర్ స్పెష‌లిస్ట్ కు నెగిటివ్ ఇమేజ్ లా ఉన్న ఈ టైటిల్ జ‌నాల‌కు ఏ మేర‌కు చేరువ అవుతుందో చూడాలి.