భారీ ప్రణాళిక అన్నారు.. ‘ఫ్యాక్టరీ’లో ఏం జరుగుతోంది?

కొన్ని రోజుల కిందటి మాట. పవన్ కల్యాణ్ కు చెందిన పవన్ కల్యాణ్ క్రియేటివ్ వర్క్స్ బ్యానర్ తో తాము భాగస్వామ్యం అయినట్టు పీపుల్ మీడియా సంస్థ ఘనంగా ప్రకటించింది. 

ఒప్పందంలో భాగంగా ఈ రెండు బ్యానర్లు కలిసి 6 చిన్న సినిమాలు, మరో 6 మీడియం రేంజ్ బడ్జెట్ సినిమాలు, ఇంకో 3 భారీ బడ్జెట్ సినిమాలు నిర్మిస్తాయని.. ఈ 15 సినిమాల్లో దాదాపు 10 సినిమాలతో కొత్త టాలెంట్ ను పరిచయం చేస్తామని కూడా ప్రకటించారు.

ఈ ప్రకటన వచ్చి ఇవాళ్టికి సరిగ్గా ఏడాది పూర్తయింది. కానీ ఇప్పటివరకు ఈ జాయింట్ వెంచర్ పై క్లారిటీ రాలేదు. ఎలాంటి ప్రణాళిక వెల్లడించలేదు. ఈ గ్యాప్ లో తన సినిమాలు తాను చేసుకుంటున్నారు పవన్. అటు పీపుల్ మీడియా నిర్మాతలు కూడా తమ సినిమాలేవో తాము ప్లాన్ చేసుకుంటున్నారు.

ఈ ఏడాదిలో జరిగిన పరిణామం ఏదైనా ఉందంటే అది వినోదాయశితం రీమేక్ మాత్రమే. పవన్ తో ఈ రీమేక్ ప్లాన్ చేస్తోంది పీపుల్ మీడియా. పవన్ కూడా ఈ ప్రాజెక్టుకు గ్రీన్ సిగ్నల్ ఇచ్చాడు. ఇంకా అధికారిక ప్రకటన రాని ఈ సినిమాతో పవన్ కల్యాణ్, టీజీ విశ్వప్రసాద్ నిర్మాతలుగా చేతులు కలిపే అవకాశం ఉంది. మధ్యలో జీ స్టూడియోస్ కూడా వచ్చి చేరింది.

ఈ రీమేక్ సంగతి పక్కనపెడితే.. మిగతా సినిమాలపై, ఈ బ్యానర్ల భాగస్వామ్యంపై క్లారిటీ ఇస్తే బాగుంటుంది. పవన్ కల్యాణ్ క్రియేటివ్ వర్క్స్ బ్యానర్ పై రామ్ చరణ్ హీరోగా ఓ సినిమా ప్రపోజల్ చాన్నాళ్లుగా పెండింగ్ లో ఉంది. 

పీపుల్ మీడియా బ్యానర్ భాగస్వామిగా మారడంతో.. పవన్ బ్యానర్ పై చరణ్ సినిమా కార్యరూపం దాల్చే అవకాశం ఉందంటూ గతంలో మెగాభిమానులు ఆశపడ్డారు. దానిపై కూడా ఇప్పటివరకు క్లారిటీ లేదు.