ప్రభాస్ రికార్డ్.. సెట్స్ పై 4 సినిమాలు

పెద్ద హీరోలంతా ఒకటి లేదా రెండు సినిమాలతోనే నెట్టుకొస్తుంటే.. ప్రభాస్ మాత్రం ఏకంగా 4 సినిమాలు చేస్తున్నాడు. ఇక్కడ 4 సినిమాలు చేతిలో ఉండడం గొప్ప కాదు, ఆ 4 సినిమాలు సెట్స్ పై ఉండడం విశేషం. అవును.. ఇన్నాళ్లూ పెండింగ్ లో ఉన్న నాగ్ అశ్విన్ సినిమాను కూడా సెట్స్ పైకి తీసుకొచ్చాడు ప్రభాస్.

ప్రభాస్-నాగ్ అశ్విన్ సినిమా ఈరోజు లాంఛ్ అయింది. రామోజీ ఫిలింసిటీలో వేసిన ప్రత్యేకమైన సెట్ లో ఈ సినిమాను పూజా కార్యక్రమాలతో స్టార్ట్ చేశారు. ప్రభాస్ తో పాటు ఈ సినిమాలో కీలక పాత్ర పోషిస్తున్న బిగ్ బి అమితాబ్ బచ్చన్ కూడా హాజరయ్యారు.

వచ్చే నెల 2వ తేదీ వరకు ఈ సినిమా షెడ్యూల్ ను ప్లాన్ చేశారు. ముందుగా అమితాబ్ బచ్చన్ పై కొన్ని సన్నివేశాలు తీయబోతున్నారు. వైజయంతీ మూవీస్ బ్యానర్ పై దాదాపు 500 కోట్ల రూపాయల బడ్జెట్ తో రాబోతోంది ఈ సినిమా. సైన్స్ ఫిక్షన్ కాన్సెప్ట్ తో వస్తున్న ఈ సినిమాకు ఇంకా పేరు పెట్టలేదు.

ఈ సినిమాతో ప్రభాస్ 4 సినిమాలు సెట్స్ పైకి వచ్చినట్టయింది. ప్రస్తుతం ఆదిపురుష్ షూట్ ముంబయిలో జరుగుతోంది. రాధేశ్యామ్ షూట్ మరో వారం రోజుల వర్క్ పెండింగ్ ఉంది. సలార్ సినిమా కొత్త షెడ్యూల్ కు రెడీ అవుతోంది. ఇప్పుడు నాగ్ అశ్విన్ సినిమా కూడా మొదలైంది.