రవితేజ పీరియాడిక్ సినిమా

మాస్ మహారాజా రవితేజకు పీరియాడిక్ సినిమాలు కొత్త కాదు. చాలానే చేసాడు. మళ్లీ మరో సినిమా చేయబోతున్నాడు. కొత్త దర్శకుడితో సితార సంస్థ నిర్మించే రవితేజ సినిమా పీరియాడిక్ బ్యాక్ డ్రాప్ లో సాగుతుందని తెలుస్తోంది. ఈ సినిమా అరకు అటవీ ప్రాంత నేపథ్యంలో జరిగే కథ అని తెలుస్తోంది.ఈ కొత్త దర్శకుడు భాను భోగవరపు ఎలాగైనా రవితేజతోనే ఈ కథ చేయాలని పట్టుపట్టి కూర్చున్నాడట.

రవితేజ ఓకె అన్న తరువాత ముగ్గురు నలుగురు నిర్మాతలకు చెప్పడం, ఆఖరికి సితార సంస్థ దగ్గర ఫిక్స్ కావడం జరిగిపోయింది. శ్రీలీల ను హీరోయిన్ గా తీసుకుని, ఇటీవలే సినిమాను స్టార్ట్ చేసిన సంగతి తెలిసిందే. ప్రస్తుతం ఓ సినిమాను పీపుల్స్ మీడియా బ్యానర్ లో చేస్తున్నాడు రవితేజ. ఆ హిందీ రీమేక్ సినిమా దాదాపు పూర్తి కావచ్చింది.

దాని తరువాత సితార సంస్థ సినిమా వస్తుంది. ప్రస్తుతానికి రవితేజ అంగీకరించిన సినిమాలు ఈ రెండే. ఈ రెండింటి తరువాత ఏ సినిమా అన్నది ఇంకా ఫిక్స్ కాలేదు. చకచకా సినిమాలు చేసే సీనియర్ హీరోల జాబితాలో ముందు వుంటారు రవితేజ.