ఏమిచ్చి రుణం తీర్చుకోగ‌ల‌నంటున్న యువ హీరో

రోడ్డు ప్ర‌మాదంలో తీవ్ర గాయాల‌పాలై మృత్యువు అంచు వ‌ర‌కూ వెళ్లి వ‌చ్చిన సాయితేజ్ మ‌ళ్లీ సాధార‌ణ జీవితాన్ని గ‌డిపేందుకు సిద్ధ‌మ‌వుతున్నాడు. 

ఇందులో భాగంగా తిరిగి షూటింగ్‌ల‌కు స‌మాయ‌త్తం అవుతున్న సంగ‌తి తెలిసిందే. త‌న మేన‌మామ‌లు చిరంజీవి, నాగ‌బాబు, ప‌వ‌న్‌క‌ల్యాణ్‌ల‌తో క‌లిసి దీపావ‌ళిని సంతోషంగా జ‌రుపుకున్నాడు. ఈ విష‌యాన్ని చిరంజీవి సోష‌ల్ మీడియా వేదిక వెల్ల‌డించారు.

త‌న ఇంట్లో అంద‌రూ క‌లిసి దీపావ‌ళిని సెల‌బ్రేట్ చేసుకున్న సంగ‌తితో పాటు సాయిధ‌ర‌మ్ తేజ్ ఆరోగ్యం గురించి చిరంజీవి చెప్పుకొచ్చాడు.

‘అందరి ఆశీస్సులు దీవెనలు ఫలించి  సాయి ధరమ్ తేజ్  పూర్తి గా కోలుకున్నాడు. మా కుటుంబసభ్యులందరికి ఇది నిజమైన పండుగ’ అని చిరంజీవి ట్వీట్‌ చేశాడు. ఈ  పోస్ట్‌ని సాయితేజ్‌ రీట్వీట్‌ చేస్తూ.. ‘నా పునర్జన్మకి కారణమైన మీ ప్రేమకి మీ ప్రార్ధనలకి ఏమిచ్చి రుణం తీర్చుకోగలను. మీ ప్రేమ పొందడం నా పూర్వజన్మ సుకృతం’ అని త‌న కృత‌జ్ఞ‌త‌ను వెల్ల‌డించాడు.

సాయిధ‌ర‌మ్ తేజ్ తీవ్ర గాయాలై ఆస్ప‌త్రిలో చికిత్స పొందుతున్న‌పుడు ర‌క‌ర‌కాల ప్ర‌చారాలు తెర‌పైకి వ‌చ్చిన సంగ‌తి తెలిసిందే. కోమాలో ఉన్నాడ‌ని, ఎవ‌రినీ గుర్తు ప‌ట్ట‌లేకున్నాడంటూ చేసిన ప్ర‌చారాలు ఆయ‌న కుటుంబ స‌భ్యుల్ని, మెగా అభిమానుల్ని తీవ్ర ఆందోళ‌న‌కు గురి చేశాయి. 

అపోలో ఆస్ప‌త్రిలో మెరుగైన వైద్యం పొంది, చివ‌రికి మృత్యంజ‌యుడిగా మ‌న మ‌ధ్య‌కు వ‌చ్చాడు. అందుకే త‌న రీట్వీట్‌లో త‌న‌ది పున‌ర్జ‌న్మ అని సాయిధ‌ర‌మ్ తేజ్ పేర్కొన‌డాన్ని అభిమానులు గుర్తు చేస్తున్నారు.