Epaper
మహేష్ బాబు, వెంకటేష్ హీరోలుగా నటించిన సినిమా సీతమ్మవాకిట్లో సిరిమల్లెచెట్టు. ఇద్దరు పెద్ద హీరోల్ని పెట్టి, ఇలాంటి కథతో కూడా మల్టీస్టారర్ మూవీ చేయొచ్చు అని నిరూపించిన సినిమా ఇది. శ్రీకాంత్ అడ్డాల దర్శకత్వంలో తెరకెక్కిన ఈ సినిమాకు కల్ట్ అభిమానులున్నారు. ఇందులో డైలాగ్స్, సాంగ్స్, మరీ ముఖ్యంగా హీరోల ఆన్ స్క్రీన్ కెమిస్ట్రీ అన్నీ సూపర్ హిట్.
మరి ఇలాంటి సినిమాకు పార్ట్-2 తీస్తే ఎలా ఉంటుంది? ఈ ఐడియా నేరుగా దిల్ రాజుకే వచ్చింది. సీతమ్మ వాకిట్లో సిరిమల్లెచెట్టు సినిమాకు సీక్వెల్ చేద్దామంటూ దర్శకుడు శ్రీకాంత్ అడ్డాల దగ్గర ప్రపోజల్ పెట్టారు రాజు. ఈ విషయాన్ని స్వయంగా ఆ దర్శకుడే బయటపెట్టాడు.
“రీసెంట్ గానే దిల్ రాజు ఓసారి నాతో అన్నారు. తెల్లారి 4 గంటలకు ఓ ఐడియా వచ్చింది. సీతమ్మవాకిట్లో సిరిమల్లెచెట్టు పార్ట్-2 చేద్దాం, ప్రిపేర్ అయిపోమన్నారు. ఆ సినిమాకు పార్ట్-2 చేస్తే బాగుంటుందని దిల్ రాజు ఫీల్ అయ్యారు. మళ్లీ ఆ కాంబినేషన్ కుదరాలి. ఆ క్రేజ్ ను కొనసాగించాలంటే దానికి తగ్గ కథ సెట్ అవ్వాలి. కథ ఏమైనా వర్కవుట్ అయితే చెబుతానని అన్నాను.”
ఇలా సీతమ్మవాకిట్లో సిరిమల్లెచెట్టు సీక్వెల్ పై స్పందించాడు దర్శకుడు శ్రీకాంత్ అడ్డాల. పెదకాపు-1 సినిమా ప్రమోషన్ లో భాగంగా గ్రేట్ ఆంధ్రతో ఎక్స్ క్లూజివ్ గా మాట్లాడిన ఈ దర్శకుడు.. సీతమ్మవాకిట్లో సిరిమల్లెచెట్టు సినిమాలో సీక్వెల్ చేయగల స్టఫ్ ఉందన్నారు.
“సీతమ్మ వాకిట్లో సిరిమల్లెచెట్టు ఉద్దేశం ఏంటంటే.. ఓ మంచి ఫ్యామిలీని చూపించాలి, మంచి ఆలోచనలుండాలి, సంస్కారం చూపించాలి అనే కాన్సెప్ట్ తీసుకున్నాను. అక్కడివరకే ఆ కథ అనుకొని, అక్కడితో ఆపేశాను. దానికి కొనసాగింపు ఉంటుంది కదా అంటున్నారు దిల్ రాజు. అది నిజమే. నా కంటే లోతుగా దిల్ రాజు ఆలోచిస్తున్నారు.”
అప్పట్లో మహేష్-వెంకీతో కలిసి ఆ సినిమా చేయడానికి తనకు నాలుగేళ్లు పట్టిందని, ఇప్పుడున్న పరిస్థితుల్లో వాళ్లిద్దర్నీ కలిపి సీతమ్మవాకిట్లో సిరిమల్లెచెట్టు పార్ట్-2 తీయడం సాధ్యమౌతుందా అవ్వదా అనే అనుమానాన్ని వ్యక్తం చేశాడు అడ్డాల.