Epaper
చివరి సినిమాను థియేటర్లలోనే రిలీజ్ చేయాలంటూ అభిమానులు డిమాండ్ చేశారు. సుశాంత్ కు నిజమైన నివాళి అదేనంటూ సెంటిమెంట్ కోణం కూడా అద్దారు. #DilBecharaOnBigScreen అనే హ్యాష్ ట్యాగ్ ను కూడా పాపులర్ చేశారు. కానీ నిర్మాతలు మాత్రం ఓటీటీకే మొగ్గుచూపారు.
ప్రస్తుత పరిస్థితుల్లో థియేట్రికల్ రిలీజ్ కోసం వెయిట్ చేసే కంటే ఓటీటీకి వెళ్లడమే కరెక్ట్ అని భావించారు. ఫలితంగా సుశాంత్ సింగ్ రాజ్ పుత్ నటించిన ఆఖరి చిత్రం “దిల్ బేచారా” త్వరలోనే ఓటీటీలో దర్శనమివ్వబోతోంది.
డిస్నీ ప్లస్ హాట్ స్టార్ సంస్థ ఈ సినిమా రైట్స్ దక్కించుకుంది. వచ్చేనెల 24న స్ట్రీమింగ్ కు పెట్టాలని నిర్ణయించింది. సుశాంత్ సింగ్ రాజ్ పుత్ కు నివాళిగా, ఆయన అభిమానులకు మద్దతుగా ఈ సినిమాను ఉచితంగా చూసే వీలు కల్పించింది హాట్ స్టార్. అంటే కేవలం సబ్ స్క్రైబర్స్ మాత్రమే కాకుండా.. బయట వ్యక్తులు కూడా ఈ సినిమాను హాట్ స్టార్ యాప్ లో ఉచితంగా చూడొచ్చన్నమాట.
లెక్కప్రకారం మే 8న ఈ సినిమా రిలీజ్ అవ్వాలి. కానీ లాక్ డౌన్ కారణంగా వీలుపడలేదు. అంతలోనే సుశాంత్ ఆత్మహత్య చేసుకున్నాడు. ఇలా ఈ సినిమా చుట్టూ చాలా గందరగోళం అల్లుకున్న నేపథ్యంలో.. వీలైనంత త్వరగా పోస్ట్ ప్రొడక్షన్ పూర్తిచేసి, సినిమాను విడుదల చేయాలని మేకర్స్ నిర్ణయించారు.
“ది ఫాల్ట్ ఇన్ అవర్ స్టార్స్” అనే నవల ఆధారంగా ఈ సినిమాను రూపొందించారు. సుశాంత్ హీరోగా నటించగా సైఫ్ అలీఖాన్ ఓ కీలక పాత్ర పోషించాడు. ఏఆర్ రెహ్మాన్ ఈ సినిమాకు సంగీతం అందించాడు.