Epaper
సాధార‌ణ ఎన్నిక‌ల‌ను త‌ల‌పించేలా ‘మా’ ఎన్నిక‌ల ప్ర‌చారం జ‌రుగుతోంది. ఓట‌ర్ల‌ను ఆక‌ట్టుకునేందుకు అన్ని ర‌కాల అస్త్రాల‌ను ప్ర‌యోగిస్తున్నారు. అలాగే ఆత్మ‌గౌర‌వ నినాదాన్ని తెర‌పైకి తేవ‌డం గ‌మ‌నార్హం. గెలుపే ప్ర‌ధానంగా ఎన్నిక‌ల ప్ర‌చారం చేప‌ట్టిన‌ట్టు నటీనటుల మాట‌లే చెబుతున్నాయి.
తాజాగా మంచు విష్ణు త‌న ప్ర‌చారాన్ని చిత్ర‌పురికాల‌నీ, కృష్ణాన‌గ‌ర్‌, మ‌ణికొండ ప్రాంతాల్లో నిర్వ‌హించారు. తాజా మాజీ అధ్య క్షుడు న‌రేశ్‌తో కలిసి ఆయ‌న నటీనటుల ఇళ్ల‌కు వెళ్లి ఓట‌ర్ల‌ను ప్ర‌స‌న్నం చేసుకునేందుకు ప‌లు హామీలు ఇచ్చారు. ఈ సందర్భంగా న‌రేశ్ మాట్లాడుతూ ప్ర‌త్య‌ర్థి ప్యాన‌ల్ అధ్య‌క్ష బ‌రిలో నిలిచిన ప్ర‌కాశ్‌రాజ్ మేఘం లాంటివాడ‌న్నారు. వ‌ర్షం కురిసి క‌రిగిపోతాడ‌ని ప్ర‌కాశ్‌రాజ్‌ను ఉద్దేశించి అన్నారు.
మంచు విష్ణు సూర్యుడిలాంటి వాడన్నారు. ప్రతి ఉదయం విష్ణు ఉదయిస్తాడని చెప్పుకొచ్చారు. ‘మా’ సభ్యులను కలిసి తనకు ఓటు వేసి తెలుగు నటీనటుల ఆత్మగౌరవాన్ని నిలబెట్టాలని మంచు విష్ణు అభ్యర్థించడం విశేషం. తాను గెలిస్తే అవకాశాల కోసం ఆరాటపడే నటీనటులకు తప్పకుండా సినిమాల్లో అవకాశాలు ఇప్పిస్తానని హామీ ఇచ్చారు.
ఇదిలా వుండ‌గా ఓటు కోసం వ‌స్తున్న సెల‌బ్రిటీల ముందు కొంద‌రు త‌మ డిమాండ్ల‌ను పెడుతున్న‌ట్టు స‌మాచారం. అందుకు త‌గ్గ‌ట్టుగానే పోటీదారులు కూడా హామీలు ఇస్తున్నార‌ని తెలుస్తోంది. సినీ సెల‌బ్రిటీలు పెద్ద ఎత్తున ప్ర‌చారానికి రావ‌డంతో ఆయా ప్రాంతాల్లో సంద‌డి నెల‌కుంది. న‌గ‌ర వాసులు ఆస‌క్తిగా గ‌మ‌నిస్తున్నారు.