హైదరాబాద్ లో ‘శ్రద్ధా వాకర్’ తరహా మర్డర్

దేశవ్యాప్తంగా సంచలనం సృష్టించిన శ్రద్ధా వాకర్ మర్డర్ కేసు గురించి అందరికీ తెలిసిందే. ఆమెను హత్య చేసి శరీర భాగాల్ని ముక్కలు ముక్కలు చేసి, వివిధ ప్రదేశాల్లో పడేసిన దారుణమైన ఘటన అది. ఆ తర్వాత ఆ తరహాలో దేశంలో మరిన్ని మర్డర్లు జరిగాయి. ఇప్పుడు ఇదే తరహా మర్డర్ హైదరాబాద్ లో కూడా జరిగింది.

6 రోజుల కిందట మలక్ పేట సమీపంలోని తీగలగూడలో ఓ మహిళ తల పోలీసులకు లభ్యమైంది. కవర్ లో చుట్టిన తల మాత్రమే దొరికింది. మొండం ఎక్కడుందనేది అంతుచిక్కలేదు. ఇప్పుడీ కేసును హైదరాబాద్ పోలీసులు కొలిక్కి తీసుకొచ్చారు. ఘటన జరిగిన తీరు చూసి పోలీసులే షాకయ్యారు.

ఇంతకీ ఆ తల ఎవరిది..?

ఓ ప్రైవేట్ హాస్పిటల్ లో నర్సుగా పనిచేసే అనురాధది ఆ తల. ఆమె నర్సుగా పనిచేస్తున్నప్పటికీ, స్థానికంగా వడ్డీ వ్యాపారం చేస్తుంటారు. ఆమె దగ్గర 18 లక్షలు అప్పు తీసుకున్నాడు చంద్రమౌళి. ఈ వ్యక్తి ఇంట్లోనే అనూరాధ అద్దెకు ఉంటోంది.

ఆన్ లైన్ ట్రేడింగ్ లో అప్పుల పాలయ్యాడు చంద్రమౌళి. దీంతో అనురాధ దగ్గర వడ్డీకి 18 లక్షలు తీసుకున్నారు. తన డబ్బు ఇవ్వమని అనురాధ ఎప్పటికప్పుడు చంద్రమౌళిపై ఒత్తిడి తీసుకొచ్చేది. ఈ క్రమంలో ఆమెను చంపేయాలని నిర్ణయించుకున్నాడు.

చైతన్యపురిలో ఉండే చంద్రమౌళి నివాసానికి అనూరాధ వచ్చింది. తన ఇంట్లోనే ఆమెను హత్య చేశాడు చంద్రమౌళి. ఆ తర్వాత మటన్ కత్తితో ఆమె తలను వేరుచేశాడు. ప్లాస్టిక్ కవర్ లో చుట్టి మూసీ నదిలో పడేశాడు. ఇతర శరీర భాగాల్ని 2 బకెట్లలో వేసి, తన ఇంట్లోనే ఫ్రిడ్జ్ లో దాచి పెట్టాడు.

ఎలా బయటపడింది..?

గుర్తుతెలియన మహిళ తల మాత్రమే లభ్యం అవ్వడంతో పోలీసులకు ఈ కేసు ఛేదించడం కష్టంగా మారింది. అయితే మృతురాలి ముఖాన్ని ఆమె సోదరి, భర్త గుర్తించారు. వాళ్లు ఇచ్చిన సమాచారం పోలీసులకు బాగా పనికొచ్చింది. ఆ సమాచారంతోనే చంద్రమౌళిని అదుపులోకి తీసుకున్నారు. అదే టైమ్ లో అతడి ఇంట్లో ఫ్రిడ్జ్ లో శరీర భాగాల్ని గుర్తించారు.

చంద్రమౌళితో సీన్ రీ-కనస్ట్రక్షన్ చేశారు పోలీసులు. అప్పుగా ఇచ్చిన డబ్బును ఎగ్గొట్టడం కోసమే, అనూరాధను హత్య చేశానని చంద్రమౌళి అంగీకరించాడు. నగరంలో ఈ ఘటన కలకలం రేపుతోంది.