Epaper
ఎట్ట‌కేల‌కు కరోనా వైరస్ (కోవిడ్‌-19) కెమెరాకు ప‌ట్టుబ‌డింది. దాని ఫొటోలు మొట్ట మొద‌టిసారిగా మ‌న దేశంలో విడుద‌ల‌య్యాయి. కంటికి క‌నిపించ‌ని కరోనా వైరస్ సూక్ష్మ‌జీవిని పుణెలోని ఐసీఎమ్ఆర్- ఎన్ఐవీ శాస్త్ర‌వేత్త‌లు ట్రాన్స్మిషన్ ఎలక్ట్రాన్ మైక్రోస్కోప్ ద్వారా ఫొటోలను తీసి ప్ర‌జ‌ల ముందుకు తెచ్చారు.
ఈ సంద‌ర్భంగా శాస్త్ర‌వేత్త‌లు కొన్ని విష‌యాల‌ను వెల్ల‌డించారు. జ‌న‌వ‌రి 30న భారత్లో కరోనా తొలి కేసు న‌మైంద‌న్నారు. ఆ కేసుకు సంబంధించి థ్రోట్ స్వాబ్ (గొంతుకు సోకిన ఇన్‌ఫెక్ష‌న్ గుర్తించేందుకు చేసే వైద్య ప‌రీక్ష) నుంచి వీటిని సంగ్ర‌హించిన‌ట్టు శాస్త్ర‌వేత్త‌లు తెలిపారు. కేరళకు చెందిన ఓ వ్యక్తి నుంచి సేకరించిన శాంపిల్స్‌లోని జన్యుక్రమం… చైనాలోని వుహాన్‌లో బయటపడ్డ సార్స్‌-కోవ్‌-2(కరోనా వైరస్) జన్యుక్రమంతో 99.98 శాతం సరిపోలిందని శాస్త్ర‌వేత్త‌లు చెప్పారు.
కాగా పుణెలోని జాతీయ వైరాలజీ సంస్థ(ఎన్ఐవీ) ప‌రిశోధ‌న‌లు చాలా ఆశాజ‌న‌కంగా ఉన్నాయి. ఈ సంస్థ ప‌రిశోధ‌న‌ల‌కు సంబంధించి వివ‌రాలు, ఫొటోలను ఇండియ‌న్ జ‌ర్న‌ల్ ఆఫ్ మెడిక‌ల్ రీసెర్చ్‌లో పొందుప‌రిచారు. ఐసీఎమ్ఆర్-ఎన్ఐవీ నేషనల్‌ ఇన్‌ఫ్లూయెంజా సెంటర్‌ టీం ‘ట్రాన్స్మిషన్ ఎలక్ట్రాన్ మైక్రోస్కోపి ఇమేజింగ్‌ ఆఫ్ సార్స్‌-కోవ్‌-2’ పేరుతో వ్యాసం ప్ర‌చురిత‌మైంది.
అంతేకాదు, భారత్లో కరోనా వైరస్ ఫొటోలను తొలిసారిగా తామే విడుదల చేసినట్లు పుణె సంస్థ పేర్కొంది. కరోనా వైరస్ కారణంగా శ్వాసకోశ వ్యవస్థ తీవ్రంగా దెబ్బతిని ప్రాణాంతక పరిస్థితి సంభవిస్తుందని పేర్కొంది. ఈ వైరస్‌కు సంబంధించిన కచ్చితమైన పరిణామక్రమం, మార్ఫాలజీ(ఆకృతి) గురించి మాత్రం ప‌రిశోధ‌న‌ల్లో పూర్తిస్థాయిలో క‌నుగొనాల్సి ఉంది. అయితే ఫుణెలో ఇంత వ‌ర‌కు జ‌రిగిన ప‌రిశోధ‌న‌లు మాత్రం త్వ‌ర‌లో కరోనా వైరస్ పుట్టు పూర్వోత్త‌రాల‌ను క‌నుగొనే అవ‌కాశం ఉంద‌నే న‌మ్మ‌కాన్ని క‌లిగిస్తున్నాయి.