తేడా కొడుతోంది…

కోవిషీల్డ్ టీకా రెండు డోసుల మ‌ధ్య వ్య‌వ‌హారం ‘తేడా’ కొడుతోంది. కోవిషీల్డ్ మొద‌టి డోస్‌కు, రెండో డోస్‌కు మ‌ధ్య ఎంత ఎక్కువ గ్యాప్ ఉంటే, అంత బాగా ప‌ని చేస్తుందంటూ కేంద్ర ప్ర‌భుత్వం స‌రికొత్త వాదన తెర‌పైకి తేవ‌డం కొంత కాలంగా దుమారం రేపుతోంది. 

వ్యాక్సిన్ల ఉత్ప‌త్తిలో అల‌స‌త్వాన్ని క‌ప్పి పుచ్చుకునేందుకే కేంద్ర ప్ర‌భుత్వం డోస్‌ల మ‌ధ్య తేడా నాట‌కానికి తెర‌లేపింద‌ని అన్ని వైపుల నుంచి విమ‌ర్శ‌లు వెల్లువెత్తాయి. డోసుల‌ వ్య‌త్యాసంపై మెజార్టీ అభిప్రాయ‌మే నిజ‌మైంది.

కోవిషీల్డ్ టీకా రెండు డోసుల మ‌ధ్య తేడా రెట్టింపు చేయాల‌ని తాము సూచించ‌లేద‌ని …ప్ర‌భుత్వం నియ‌మించిన శాస్త్రీయ బృందంలోని ముగ్గురు నిపుణులు తేల్చి చెప్పారు. ఇది ఇప్పుడు తీవ్ర సంచ‌ల‌నం రేకెత్తిస్తోంది. 

ఈ ముగ్గురు నిపుణులు … ఎన్‌టాగీ స్టాండింగ్‌ టెక్నికల్‌ సబ్‌ కమిటీ సభ్యులు డాక్టర్‌ ఎండీ గుప్తే, డాక్టర్‌ మాథ్యూ వర్ఘీస్‌, డాక్టర్‌ జేపీ ములియిల్‌. వీరిలో ములియిల్‌ కొవిడ్‌-19 వర్కింగ్‌ గ్రూపు సభ్యుడు కూడా కావ‌డం గ‌మ‌నార్హం.  

కోవిషీల్డ్ వ‌చ్చిన మొద‌ట్లో ఫ‌స్ట్ డోసుకు, సెకెండ్ డోసుకు మ‌ధ్య తేడా 4 నుంచి 6 వారాలుగా కేంద్ర ప్ర‌భుత్వం నిర్ణ‌యించింది. ఆ త‌ర్వాత ఆ తేడా ఒక్క‌సారిగా మూడింత‌లు కావ‌డం అంద‌ర్నీ ఆశ్చ‌ర్య‌ప‌ర‌చ‌డంతో పాటు ఆందోళ‌న‌కు గురి చేసింది. కోవిషీల్డ్ మొద‌టి, రెండో డోసుల మ‌ధ్య వ్య‌త్యాసాన్ని 12 నుంచి 16 వారాల‌కు పెంచుతూ కేంద్ర ప్ర‌భుత్వం గ‌త నెల (మే) 13న కీల‌క ప్ర‌క‌ట‌న చేసింది.

బ్రిటన్ అధ్యయనాల ఆధారంగా ‘జాతీయ సాంకేతిక పరిజ్ఞాన సలహా బృందం (ఎన్‌టాగీ)’ చేసిన సూచనల మేరకే డోసుల మధ్య తేడాను పెంచుతూ నిర్ణయం తీసుకున్నామని కేంద్రం స్ప‌ష్టం చేసింది. దీంతో సెకెండ్ డోసు వేయించుకోవాల‌ని స‌న్న‌ద్ధ‌మ వుతున్న వారు అయోమ‌యానికి గుర‌య్యారు. ఒక్క‌సారిగా నిరాశ‌కు గుర‌య్యారు.

మ‌రోవైపు కోవిషీల్డ్ దొర‌క‌ని ప‌రిస్థితి. డిమాండ్‌కు త‌గ్గ‌ట్టు టీకా ల‌భ్యం కాక‌పోవ‌డం వ‌ల్లే కేంద్ర‌ప్ర‌భుత్వం అమాంతం తేడా పెంచింద‌నే విమ‌ర్శ‌లు అప్ప‌ట్లో గుప్పుమ‌న్నాయి. నేడు ముగ్గురు నిపుణుల ప్ర‌క‌ట‌న‌తో అదే నిజ‌మైంద‌ని దేశ వ్యాప్తంగా చ‌ర్చ‌కు దారి తీసింది. 

ఈ నేప‌థ్యంలో ఎన్‌టాగీలోని కొవిడ్‌-19 వర్కింగ్‌ గ్రూప్‌ అధిపతి ఎన్‌కే అరోడా స్పందిస్తూ మే 10 నుంచి 13 నడుమ జరి గిన ఎన్‌టాగీ సమావేశాల్లో కొవిషీల్డ్‌ డోసుల మధ్య తేడా పెంపు నిర్ణయంపై గుప్తే, వర్ఘీస్‌, ములియిల్‌ ఎలాంటి అసమ్మతీ తెలియ జేయలేదన్నారు. 

శాస్త్రీయ ఆధారాలు, ఏకాభిప్రాయంతోనే డోసుల మ‌ధ్య వ్య‌త్యాసాన్ని పెంచుతూ నిర్ణ‌యం తీసుకున్నామ‌ని తాజా విమ‌ర్శ‌ల‌ను కొట్టి పారేయ‌డం గ‌మ‌నార్హం. కానీ కేంద్ర ప్ర‌భుత్వ మాట‌ల‌ను న‌మ్మే ప‌రిస్థితి లేదనే వారే ఎక్కువ‌.