మామా ఏక్ పెగ్ లా.. అత్యంత పురాతన వైన్ ఇది

ప్రపంచవ్యాప్తంగా వైన్ ప్రియులున్నారు. ఎంత ఓల్డ్ వైన్ తాగితే అంత గొప్ప. రేటు కూడా అదే విధంగా ఉంటుంది. మరి ప్రపంచంలోనే అత్యంత పురాతనమైన వైన్ ఏది? దీనికి సమాధానంగా నిలిచింది జర్మనీలో కనుగొన్న ఓ వైన్.

జర్మనీకి చెందిన స్పెయర్ నగరంలో రోమన్ సమాధుల్లో ఓ వైన్ బాటిల్ ను కనుగొన్నారు. పూర్వకాలం రోమన్ సమధుల్లో ఇలా వైన్ బాటిల్స్ పెట్టడం ఆనవాయితీ. అలా పెట్టిన 16 బాటిళ్లలో 15 చెడిపోగా..ఇదొక్కటే మిగిలింది. అదే ప్రపంచంలోని అత్యంత పురాతనమైన వైన్.

ఈ వైన్ వయసు అక్షరాలా 1650 సంవత్సరాలుగా తేల్చారు నిపుణులు. మరో ఆశ్చర్యకరమైన విషయం ఏంటంటే.. ఈ వైన్ ను తాగొచ్చంట. ఏమాత్రం చెడిపోకుండా శుభ్రంగా ఉందంట. కేవలం సీసా మాత్రమే పాడుబడిందని, లోపల వైన్ మాత్రం స్వచ్ఛంగా ఉందని చెబుతున్నారు. అయితే ఇంతవరకు ఎవ్వరూ దీన్ని టేస్ట్ చేయలేదు.

క్రీ.శ 325-359 సంవత్సరాల మధ్య ఈ వైన్ ను తయారుచేసినట్టు గుర్తించారు. బయటగాలి బాటిల్ లోపలకు చొరబడకుండా ఆలివ్ ఆయిల్ తో మూతను కప్పిన విధానం శాస్త్రవేత్తల్ని సైతం ఆశ్చర్యానికి గురిచేసింది.

వైన్ ప్రొఫెసర్ మోనికా క్రిస్టమన్ ఈ బాటిల్ ను అధ్యయనం చేశారు. మైక్రో-బయలాజికల్ ప్రకారం, ఈ వైన్ కలుషితం కాలేదని ఆమె ప్రకటించారు. అయితే ఇప్పుడున్న వాతావారణ పరిస్థితుల్లో ఈ వైన్ ను టేస్ట్ చేయకపోవడమే మంచిదని ఆమె అభిప్రాయపడ్డారు.

మొత్తమ్మీద ప్రపంచవ్యాప్తంగా ఎన్నో పురాతన వైన్ బాటిళ్లపై అధ్యయనం చేసి, అత్యంత పాత వైన్ గా ఈ బాటిల్ కు గుర్తింపునిచ్చారు నిపుణులు.