కుటుంబం ఒత్తిళ్లు.. తప్పుకుంటున్న ఐష్!

‘యే దిల్ హే ముష్కిల్’  సినిమాలో ఐష్ నటించడం, కనిపించిన తీరుపై బచ్చన్ల అసంతృప్తి బాహాటంగానే అర్థమైపోయింది. కోడలు ఇది వరకూ నటించిన రెండు సినిమాల ప్రమోషన్ లో భాగస్వామి అయిన అమితాబ్.. ఈ తాజా సినిమా ను ఆది నుంచి పట్టించుకోకపోవడంతో మొదలైన ఈ వ్యవహారం.. ఇందులో రణ్ భీర్ తో ఐష్ సన్నిహితంగా నటించిన సన్నివేశాలను ఆయన దగ్గరుండి సెన్సార్ చేయించాడనే వార్తలు రావడం తో పీక్స్ కు వెళ్లింది.

ఇక ఈ సినిమా గురించి అభిషేక్ కూడా ఎక్కడా పొరపాటున కూడా మాట్లాడలేదు. ఐష్ ఆ మధ్య నటించిన సరబ్జీత్, జగ్బా వంటి సినిమాల విషయంలో ఆనందంగా స్పందించిన బచ్చన్లు ఈ సారి అస్సలు మాట్లాడలేదు. దీనికంతటికీ కారణం ఐష్ గ్లామరస్ రోల్ లో కనిపించడం వారికి ఇష్టం లేదు.. అనే మాటే వినిపించింది.

ఈ నేపథ్యంలో.. ఈ సినిమా ప్రమోషన్ కు ఐశ్వర్య బిగ్ బాస్ 10లో కూడా పాల్గొంటుందనే వార్త మరింత ఆసక్తికరంగా నిలిచింది. అయితే, ఇప్పుడు మాత్రం అదేమీ లేదని తెలుస్తోంది. అది మాత్రమే కాదు.. ఇకపై ఈ సినిమా ప్రమోషన్ కే దూరంగా ఉండాలని ఐష్ డిసైడ్ అయ్యిందని బాలీవుడ్ సమాచారం. ఈ సినిమా యూనిట్ అయితే.. ఐష్ ను బిగ్ బాస్ కు పంపించి.. సినిమాను ప్రమోట్ చేయిద్దామని భావించిందని.. దానికి మొదట ఐష్ కూడా ఓకే చెప్పిందని వార్తలు వచ్చాయి.

అయితే ఇక ఈ సినిమాను ఐష్ ఇంతటితో వదిలేయాలని నిర్ణయించుకుందట. ఐష్ విషయంలో బచ్చన్ల ఒత్తిళ్లు ఈ విధమైన ఫలితాలను ఇస్తున్నాయని తెలుస్తోంది. మరి సినిమా విడుదల కాకుండానే ఇంత జరుగుతోందంటే.. ఇకపై అసలు ఐష్ వేరే సినిమాల్లో అయినా నటించేనా? విరమించుకుంటుందా? అనే సందేహాలూ రేగుతున్నాయి.