జగన్ కంటే చంద్రబాబుకు తొందర ఎక్కువ

ఏ ప్రభుత్వమైనా సరే తాము అసాధ్యాలను సుసాధ్యం చేశామని, ప్రజాసేవలో అద్భుతాలు సృష్టించామని ప్రజల ఎదుట చాటి చెప్పుకోవడానికి ఉత్సాహపడుతుంది. నిన్నటిదాకా జగన్మోహన్ రెడ్డి పరిపాలన సాగించినా, ఇవాళ చంద్రబాబు నాయుడు పరిపాలన సాగిస్తున్నా.. ఇద్దరి పనితీరులోనూ ఈ విషయంలో మాత్రం తేడా ఉండదు. నిన్న జగన్ చేసిన పని ఇవాళ చంద్రబాబు నాయుడు కూడా చేస్తారు!

అయితే ఇలా సొంత డబ్బా కొట్టుకునే విషయంలో చంద్రబాబు నాయుడుకు జగన్ కంటే చాలా తొందర ఉన్నట్లుగా కనిపిస్తుంది. ఎందుకంటే నాలుగేళ్ల పాలన పూర్తయిన తర్వాత జగన్మోహన్ రెడ్డి ఇంటింటికి వైఎస్ఆర్ కాంగ్రెస్ పేరుతో ప్రభుత్వం సాధించిన విజయాలను ప్రతి ఒక్కరికి చాటి చెప్పాలని పార్టీ ఎమ్మెల్యేలను పురమాయించి పంపారు. చంద్రబాబు నాయుడు 100 రోజులు పూర్తి కాగానే తాము సాధించిన విజయాలను రాష్ట్రమంతా టముకు వేయాలంటూ నాయకులను పురమాయిస్తున్నారు.

చంద్రబాబు నాయుడు తెలుగుదేశం పార్టీ నాయకులతో టెలి కాన్ఫరెన్స్ నిర్వహించారు. 100 రోజుల ప్రభుత్వ కాలంలో సాధించిన విజయాలను గురించి ఇంటింటికి తిరిగి ప్రజలకు తెలియజేయాలని ఆయన పార్టీ వారికి మార్గదర్శనం చేశారు. అలాగే 2029 సంవత్సరం నాటికి తెలుగుదేశం పార్టీని తిరుగులేని అజేయమైన శక్తిగా రూపొందిస్తామని కూడా ఆయన సెలవిచ్చారు.

అంతా బాగానే ఉంది కానీ ఇంటింటికి తిరిగి ప్రచారం చేయడం మొదలెడితే తల బొప్పి కడుతుందని పార్టీ కార్యకర్తలు వ్యాఖ్యానిస్తున్నారు. ఎందుకంటే ప్రభుత్వం కొన్ని హామీలను ఇప్పటికే నెరవేర్చుకున్నప్పటికీ.. వేటి కోసమైతే ప్రజలు అత్యంత ఆశతో ఎదురుచూస్తున్నారో అలాంటి కీలక హామీలు ఇప్పటిదాకా కార్య‌ రూపం దాల్చలేదు.

సూపర్ సిక్స్ హామీలకు అతీగతీలేదు ఎప్పుడు అవి అమలులోకి వస్తాయనే సమాచారం కూడా ప్రభుత్వ పెద్దలు ఎవరూ చెప్పడం లేదు. అలాగే పార్టీ పరంగా కూడా శ్రేణుల్లో నిరుత్సాహం ఉంది. నామినేటెడ్ పదవుల భర్తీ గురించి ఇప్పటిదాకా పట్టించుకోలేదు. కార్యకర్తలు గంపెడాశలు పెట్టుకుని ఎదురుచూస్తున్నారు. చంద్రబాబు నాయుడు మాత్రం 100 రోజులలోగా నామినేటెడ్ పదవులన్నీ ప్రకటించేస్తాం అని అన్నారు కానీ ఆ గడువు పూర్తయింది తప్ప వారి ఆశలు మాత్రం జరగలేదు.

ఇప్పుడు మళ్లీ కార్యకర్తలను ఇంటింటికి తిరిగి వందరోజుల పురోగతి గురించి చెప్పమని ఆయన పనులు పురమాయిస్తున్నారు. ప్రజల వద్దకు వెళితే సూపర్ సిక్స్ హామీల గురించి నిలదీయడం జరుగుతుందని వాటిలో కనీసం సగమైనా పూర్తి చేసి వెళ్లితే తప్ప మర్యాద దక్కదని.. ఒకసారి ప్రజలు నిలదీయడం మొదలెడితే ప్రభుత్వం 100 రోజులకే భ్రష్టు పట్టిపోయినట్లుగా ప్రజల ఎదుట ఒక ఇంప్రెషన్ ఏర్పడుతుందని పార్టీ కార్యకర్తలు మధనపడుతున్నారు. మరి చంద్రబాబు నాయుడు ఏ రకంగా ముందుకు వెళతారో వేచి చూడాలి.