బామ్మర్ది ఫాంహౌస్ లో డ్రగ్స్ పార్టీ: చిక్కుల్లో కేటీఆర్!

భారత రాష్ట్ర సమితి వర్కింగ్ ప్రెసిడెంట్ కల్వకుంట్ల తారక రామారావు సొంత బావమరిది రాజ్ పాకాల కు చెందిన జన్వాడ ఫామ్ హౌస్ లో డ్రగ్స్ పార్టీ జరిగిందని ఆరోపణలు ఇవాళ తెలంగాణ రాష్ట్ర రాజకీయాలను ఒక కుదుపు కుదుపుతున్నాయి. అనుమతి లేకుండా జరుగుతున్న పార్టీలో పలువురిని పోలీసులు అదుపులోకి తీసుకున్నారు. వీరిలో విజయ్ అనే వ్యక్తికి డ్రగ్స్ తీసుకున్నట్టుగా పాజిటివ్ రిపోర్టు వచ్చింది. ఆయన మీద కేసు నమోదు చేశారు.

అలాగే ఫామ్ హౌస్ యజమాని రాజ్ పాకాల మీద, ఆ ఫామ్ హౌస్ సూపర్వైజర్ కార్తీక్ మీద కూడా కేసులను నమోదు చేసి అక్కడ దొరికిన కర్ణాటక లిక్కర్ విదేశీ మద్యం సీసాలను కూడా స్వాధీనం చేసుకున్నారు. ఈ జన్వాడ ఫామ్ హౌస్ పార్టీ వ్యవహారంలో కేటీఆర్ ఎంత లోతుగా ఇరుక్కోబోతున్నారు అనేది ఇప్పుడు కీలకమైన చర్చనీయాంశంగా ఉంది.

జన్వాడ ఫామ్ హౌస్ లో పార్టీ జరుగుతుండగా పెద్ద ఎత్తున వస్తున్న చప్పుళ్లపై ఫిర్యాదు అందుకున్న ఎక్సైజ్ పోలీసులు దాడులు నిర్వహించారు. పలువురిని అదుపులోకి తీసుకున్నారు. జన్వాడ ఫామ్ హౌస్ తోపాటు కేటీఆర్ బావమరిది రాజు పాకాల నివాసం ఉంటున్న ఓరియన్ విల్లాస్ వద్దకు కూడా పోలీసులు తనిఖీలు నిమిత్తం చేరుకున్నారు.

రాజ్ పాకాల నివాసం ఉంటున్న విల్లా తాళం వేసి ఉండటంతో తలుపులు పగలగొట్టి లోనికి వెళ్లే తనిఖీలు నిర్వహించేందుకు పోలీసులు సిద్ధపడుతున్నారు. కాగా అక్కడికి పెద్ద సంఖ్యలో చేరుకున్న భారత రాష్ట్ర సమితి నాయకులు పోలీసులను అడ్డుకొని ఆందోళన చేస్తున్నారు.

ఎక్సైజ్ పోలీసుల జేబులను కూడా తనిఖీ చేసిన తర్వాత గాని వారిని లోపలికి అనుమతించేది లేదని.. బీఆర్ఎస్ నాయకులు గొడవ చేస్తుండడం గమనార్హం ఎక్సైజ్ పోలీసులే అక్కడ డ్రగ్స్ ఉంచి ఆ తర్వాత కేసు నమోదు చేసే ప్రమాదం ఉన్నదని వారు అంటున్నారు.

ఇదంతా ఒక ఎత్తు అయితే రాత్రి జరిగిన పార్టీలో కేటీఆర్ భార్య శైలిమ కూడా ఉన్నట్లుగా ఒక ప్రచారం జరుగుతుంది. అదే నిజమైతే గనుక కేటీఆర్ కు మరింత ఇబ్బందులు తప్పక పోవచ్చు. ఓరియన్ విల్లాస్ లోని రాజ్ పాకాల సోదరుడు శైలేంద్ర నివాసంలో తనిఖీలు చేపట్టడానికి పోలీసులు ప్రయత్నించడం పెద్ద ఎత్తున టిఆర్ఎస్ పార్టీ దళాలు ప్రతిఘటించడం జరుగుతుంది. ఈ రేవ్ పార్టీ వ్యవహారం తెలంగాణలో అత్యంత సీరియస్ హాట్ టాపిక్ గా మారుతుంది. కేటీఆర్ మెడకు ఎంత స్ట్రాంగుగా ఈ కేసు చుట్టుకుంటుందో అర్థం కావడానికి ఇంకా ఒక రోజు గడవాలని విశ్లేషకులు భావిస్తున్నారు.