Epaper
పార్టీ కేడర్ కి పొలిటికల్ క్లాసులు ఇక్కడే- నేడే! రండి.. ప్రపంచంలో దోచుకోడానికి అద్భుత అవకాశాలున్న దేశం భారత దేశం ఒక్కటే.
పార్టీ శ్రేణులారా! దేశాన్ని ఎలా పరిపాలించాలీ అనే శిక్షణ మీకిస్తే దేశం అవినీతిలో అద్భుతంగా అభివృద్ధి చెందుతుంది. ముందు మీరు తెలుసు కోవలసిన్దేంటంటే మన రాజకీయ రూల్ బుక్‌లోని లోపాలు. వాటిని ఎలా సద్వినియోగం చేసుకోవటం అనే అంశం.
ఉదాహరణకి మీరు ఒక పార్టీ నుంచి పోటీ చేసి గెలిచారు. కానీ మీ పార్టీ అధికారంలోకి రాలేక పోయింది. అప్పుడు మీరేం చేస్తారు? అయిదేళ్ళ పాటు కోట్లు సంపాదించే అవకాశాన్ని పోగొట్టు కుంటారా? కోరు కదా! అందుకని కోట్లు లంచం తీసుకుని అధికారంలో ఉన్న పార్టీలోకి జంప్ అయిపోవాలనుకుంటారు. పోండి. ఏం ఫికర్ లేదు. అయితే జంప్ అయేముందు మీ పార్టీనీ, దాని లీడర్స్నీ బండ బూతులు తిట్టండి. పార్టీలో ఇంటర్నల్ డెమోక్రసీ లేదు. నియంతృత్వ పోకడలు మితి మీరాయ్ అని స్టేట్మెంట్ ఇవ్వండి. తర్వాత అధికారంలో ఉన్న పార్టీతో కాష్ డీల్ కుదుర్చుకోండి.
ఇక్కడ మీరు తీసు కోవలసిన జాగ్రత్త ఏమిటంటే మీరు తీసుకునే కాష్ ఇంట్లో కాకుండా జంగిల్లో తీసుకోండి. అక్కడయితే సీసీ కేమేరాలుండవ్. ఏసీబీ వాళ్ళు కూడా రాలేరు. ఒకవేళ వచ్చినా వాళ్ళు మీరు అరేంజ్ చేసిన కెమెరాలో దొరికిపోతారు. మీకు కనబడి పోతారు. అప్పుడు మీరు ముందే ఏర్పాటు చేసుకున్న వేట కుక్కల్ని వాళ్ళ మీదకు వదలండి. వాళ్ళిక వెనక్కు తిరిగి చూడరు. కాని ఆ క్యాష్‌ని ఇంట్లో బ్యాంకులో కాకుండా మీ సెకండ్ సెటప్ పేరు మీద పడేయండి. ఏసీబీకి దొరక్కుండా తప్పించుకోవచ్చు.
ఈ క్యాష్ డీలింగ్స్‌తో కిరికిరు లెందుకు? అనుకునే వారికి రెండో ఆప్షన్ ఏమిటంటే క్యాష్ బదులు మంత్రి పదవో దాన్ని మించిన ఇంకో పదవో ఎన్నుకోండి. ఇది చాలా సేఫ్ పద్దతి. మిమ్ముల ఎవడూ పీకలేడు. క్యాష్ బదులు పదవి తీసుకుంటే కోర్టులూ చట్టాలూ కూడా మీ జోలికి రావ్. ఆ పదవిని అడ్డు పెట్టుకుని అప్పుడిక దేశాన్ని లూఠీ చేయండి. ఎవడయినా అడ్డుకుంటే వట్టు. పైగా మీమీద ప్రజలకు కూడా నమ్మకం కలుగుతుంది. వీడు తింటాడు, తినిపిస్తాడు అని!
ఇప్పుడు ఎవరికయినా ఏమైనా డౌట్‌లుంటే అడగ వచ్చు.
సార్.. రాష్ట్రంలో మంతి పదవితో ఎక్కువ తినొచ్చా? కేంద్ర మంత్రి పదవితో ఎక్కువ దులపచ్చా?
అరే పాగల్.. పోస్ట్ ఏంటనేది కాదు బే! నీ దమ్మెంత అనేది మేటర్. నీకు తెలివి ఉంటే మునిసిపల్ కార్పొరేటర్ పోస్ట్ చాల్రా. పది తరాలకు సరిపడా సంపాదించు కోవచ్చు. నెక్స్ట్ ?
సార్ నాకు కేంద్రంలో మంత్రి పదవి ఆఫర్ వచ్చిందనుకోండి. అప్పుడు ఫ్రాడ్ ఎలా చేయాలి?
వెరీ సింపుల్ దేశాన్ని మంత్రులు లూఠీ చేయడానికి రకరకాల స్కీం లున్నాయ్. కల్మాడీ స్కీం లో ఏం చేస్తారంటే లక్ష రూపాయల ఖరీదు చేసేవి ఏమైనా గానీ వంద కోట్లు పెట్టి కొన్నట్లు బిల్స్ పెట్టాలి. ఇక టెలికాం రాజా స్కీంలో ఏంచేయాలంటే నీ ఇష్టం వచ్చిన వాడికి లక్షల కోట్లు లంచాలు తీసుకుని మొత్తం లైసెన్స్లు ఇచ్చేసేయవచ్చు.
ఇక మారన్ ,కనిమోలి అనే స్కీం ఇంకోటుంది.
కాని వాళ్ళందరూ జైలు కెళ్ళారు కదా.
ఎన్నాళ్ళు జైల్లో ఉన్నారు?
కొద్ది రోజులు.
ఇప్పు డెక్కడున్నారు?
ఎవరింట్లో వాళ్ళు.
నీకేమైనా తెలివుందా? లక్షల కోట్లు కాజేసాక నాల్రోజులు జైల్లో ఉంటానికి ఏం రోగం. పైగా వాళ్ళ జైలు ఎలా ఉంటుందో తెలుసా నీకు?
ఇంటి కంటే బాగుంటుందని విన్నా.
మరింకా ఆ ఏడుపెందుకు? నెక్స్ట్ ఎవరబ్బా?
సార్.. ఒక్క సీకెట్ చెప్పండి సార్. ఇటు టీవీ చానల్స్‌కీ అటు సీబీఐకీ దొరక్కుండా లక్షల కోట్లు నొక్కేయటం ఎలా? అంత మనీ బ్యాంకుల్లో దాస్తే దొరికి పోతాం కదా. ఇంకో దారేంటి మరి?
నీయవ్వ ఇంత దేడ్ దమాక్ గాళ్ళు రాజకీయాల్లో కెందుకొస్తార్రా.. మిర్చి బజ్జీలమ్ముకోక?
ఆ బిజినెస్‌ల కోట్ల లాభాలేడకెళ్లి వస్తాయ్ సార్? రావనే కదా పాలిటిక్స్‌ల కొచ్చింది?
అయితే బాగావిను.. నీకు రాజశేకర్ రెడ్డి స్టోరీ తెల్సు కదా.. ముందు నువ్వో పనికిరాని ఇండస్ట్రీ పెట్టాలె.
ఇండస్ట్రీ పెట్టేన్ని పైసలుంటే ఇంకా పాలిటిక్స్‌లో కెందు కొస్తాన్సార్ ?
అందుకే నిన్ను దేడ్ దమాక్ అనేది. ఇండస్ట్రీ నిజంగా పెట్టద్దురా.. కాగితం మీద పెట్టాలె.. అది కూడా బజ్జీల ఇండస్ట్రీ అనుకో. ఆ కంపెనీ షేర్లు ఒకోటి కోటి రూపాయల కమ్మాలె.
ఏమ్సార్.. బజ్జీల కంపెనీ షేర్లు ఒకోటీ కోటి రూపాయలకు ఎవడైనా కొంటాడా సార్? నేనేం చెవిలో పూలు పెట్టుకున్నానా?
అరే హౌలే.. మాజీ ఏపీ సీయం చేసిన దేన్ట్రా మరి.. అలా కొన్నందుకు గజం లక్ష రూపాయలు పలికే వందల ఎకరాల ప్రభుత్వ భూములు నీ షేర్లు కొన్నోడికి ఎకరం పది వేలకు అమ్మాలె.
అప్పుడు నేను ఫ్రాడ్ చేసినట్లు తెలిసి పోతుంది గద్సార్?
తెలిస్తే తెలియనీరా. నువ్వెందుకు పరేషాన్ అవుతున్నావ్?
మంచిగున్నావా భాయ్. న్యూస్ పేపరోళ్ళూ, టీవీ చానలోళ్ళు నా దుమ్ముదులుపుతారు కదా.
దులపకుండా వాళ్ళ షేర్ వాళ్లకు పడేయ్యాలె.
అంతే చానలోళ్ళు లంచాలు తీసుకుంటారా?
తీసుకోక పొతే మరి జీ న్యూస్ వాడిని జైల్లో ఎందు కేసారు?
ఒకవేళ వాళ్ళతో నాకు బేరం కుదరలేదనుకో.. అప్పుడు గడబిడయిపోదూ?
అయితే అవనీ.. ఇదే దందా చేసిన రాజస్థాన్ సీఎం వసుంధరని ఎవడేమి చేయగలిగాడు? ఆఖరికి నిప్పులాంటి మోడీ కూడా వసుంధర జోలికి వెళ్ళడానికి భయపడి ఫారిన్ టూర్‌కి పారిపోయాడు. అంచేత నువ్వు తెల్సుకోవల్సిన్దేంటంటే మన దేశంలో అవినీతి పరులదే రాజ్యం.. నెక్స్ట్?
సార్ నువ్వు చెప్పిన ఐడియా మంచిగానే ఉంది గానీ జరంత కామ్ప్లికేటేడ్ గా ఉన్నది. జరంత ఈజీ ట్రిక్ ఏదయినా చెప్పరాదు?
అయితే ఒక పని చెయ్. నువ్వు ఎవడి దగ్గరైతే ఫ్రాడ్ చేయదలచుకున్నావో వాడి కంపెనీకి నీ పెళ్ళాన్ని అడ్వైజర్‌గా పెట్టు. అలా అడ్వైజర్‌గా ఉన్నందుకు నెలకు 10 కోట్లు ఫీజు తీసుకో.. తర్వాత వాడికి వేల కొట్లలో లాభం వచ్చేట్లు ఫ్రాడ్ చేసేయ్. ఈ రకం టెక్నిక్‌ని సుష్మా స్వరాజ్ టెక్నిక్ అంటారు. ఒకే.. ఇవాల్టికి ఈ క్లాస్ అయి పోయింది. రేపు మరి కొన్ని విషయాలు తెలుసు కొందాం హ్యాపీ పాలిటిక్స్.. బై.
యర్రం శెట్టి సాయి