ఆ సినిమాలో లేడీస్ క్రికెట్

నాని ‘జెర్సీ’, విజయ్ దేవరకొండ ‘డియర్ కామ్రేడ్’, నాగ్ చైతన్య-శివనిర్వాణ, ఈ మూడు సినిమాల్లో క్రికెట్ గేమ్ కాస్త కీలకంగా వుంటుందని ఇప్పటికే వెల్లడించిన సంగతి తెలిసిందే. అయితే ఈ మూడింటిలో డియర్ కామ్రేడ్ దర్శకుడు తన కథను ఎప్పుడో మూడేళ్లక్రితం తయారుచేసుకున్నాడు. అది కూడా కాలేజీ రాజకీయాలు, యూనియన్లు, ఆ వ్యవహారాల నేపథ్యంలో.

అయితే ఇందులో హీరో క్రికెటర్ కాదట. హీరోయిన్ క్రికెటర్ అన్నమాట. కాలేజీలో హీరో వ్యవహారం అంతా యూనియన్లు, రాజకీయాలు అయితే హీరోయిన్ వ్యవహారం క్రికెట్ అన్నమాట. ఈ ఇద్దరి మధ్య లవ్ అదంతా వేరే సంగతి.

అయితే లేడీ క్రికెటర్ అంటే సినిమాకు కాస్త కొత్త గ్లామర్ అనుకోవాల్సిందే. సినిమాలో లేడీ క్రికెటర్ల మ్యాచ్ కూడా కొంచెం జోడిస్తే మరీ సూపరేమో?  బహుశా డైరక్టర్ కు కూడా ఆ మాత్రం ఆలోచన వుండే వుంటుంది. మొత్తంమీద మూడు క్రికెట్ సినిమాలు. విశేషాలు ఒక్కోటీ బయటకు వస్తుంటే, మరింత రంజుగా వుంటుంది.