ఆర్తి అదృష్టం.. ఛార్మికి ద‌క్కిందా?

చిత్రసీమ‌లో సెంటిమెంట్లకు కొద‌వ లేదు. అదృష్టమే అంద‌లాలు ఎక్కిస్తుంద‌నే న‌మ్మకం చాలాసార్లు నిజ‌మైంది కూడా. ఆర్తి అగ‌ర్వాల్ కూడా త‌న అదృష్టాన్ని ఛార్మికి ట్రాన్స్‌ఫ‌ర్ చేసింద‌ట‌. అదెలాగంటే…

ఆర్తి క‌థానాయికగా ఎంట్రీ ఇచ్చిన చిత్రం నువ్వు నాకు న‌చ్చావ్‌. ఆ త‌ర‌వాత నువ్వు లేక నేను లేను లో న‌టించింది. ఈ రెండు సినిమాలు చేస్తున్నప్పుడు ఆర్తి మ‌కాం హైద‌రాబాద్‌లోని సురేష్ గెస్ట్ హౌస్‌లోనే.  తొలి రెండు చిత్రాలూ సూప‌ర్ హిట్ట‌యి, ఆర్తికి వ‌రుస‌గా అవ‌కాశాలు రావ‌డం మొద‌ల‌య్యాయి. స్టార్ హోదా తెచ్చుకొంది.

 దాంతో ఆర్తి హైద‌రాబాద్లో త‌న సొంత డ‌బ్బుల‌తో ఓ గెస్ట్ హౌస్ కొనుగోలు చేసింది. ఆ త‌ర‌వాత ఆమె స్టార్ డ‌మ్ మ‌రింత పెరిగింది. ఒక ద‌శ‌లో అత్యధిక పారితోషికం అందుకొంటున్న క‌థానాయిక‌ల జాబితాలో ఆర్తి పేరు కూడా చేరిపోయింది.

కొంత‌కాలానికి  అవ‌కాశాలు త‌గ్గి, ఆర్థికంగా కాస్త ఇబ్బంది ప‌డుతున్నప్పుడు ఆ గెస్ట్ హౌస్ అమ్మకానికి పెట్టింది. అనుకోకుండా ఆ గెస్ట్ హౌస్ ఛార్మి చేజిక్కించుకొంది. ఆ గెస్ట్ హౌస్ కొన్నాకే ఛార్మికి టైమ్ క‌ల‌సొచ్చింద‌ట‌. కొంత‌కాల‌నికే జ్యోతిల‌క్ష్మి సినిమా ప‌ట్టాలెక్కింద‌ట‌. నిర్మాత‌గానూ మారింద‌ట‌. అలా ఆర్తి అగ‌ర్వాల్ గెస్ట్ హౌస్ సెంటిమెంట్ త‌న విష‌యంలో నిజ‌మైంద‌ని ఛార్మి కాస్త ఆవేద‌న నిండిన స్వరంతో.. చెప్పుకొచ్చింది.