అఖిల్ సినిమాకు దేవీపుత్రుడు ప్రేరణా?

దేవీ పుత్రుడు సినిమా గుర్తుందిగా..వెంకటేష్ హీరోగా కోడిరామకృష్ణ దర్శకత్వంలో ఎమ్ ఎస్ రాజు నిర్మించిన సినిమా. అంజలా ఝవేరి హీరోయిన్. సముద్రగర్భంలోంచి బయటకు తీసిన పెట్టెను మళ్లీ అందులోకి ప్రవేశపెట్టడం, సముద్రంలో మునిగిపోయిన ద్వారక పట్టణం నేపథ్యంలో తయారైన సినిమా. గ్రాఫిక్స్, కథాంశం అంతా బాగుంటాయి కానీ ఎందుకో జనాలను అంతగా ఆకట్టుకోలేదు. 

వర్తమానానికి వస్తే, వివి వినాయక్ తాజాగా తీస్తున్న అఖిల్ సినిమా కథాంశం కూడా ఫాంటసీనే. ఈ విషయం చాలా కాలం కిందటే గ్రేట్ ఆంధ్ర వెల్లడించింది. అఖిల్ పేరుతో తీస్తున్న సినిమాలో అఖిల్ నే హీరో. ఈ సినిమా కథాంశం కూడా ఓ శక్తులున్న బంతి లాంటి ఆకారం చుట్టూ తిరుగుతుందని వినికిడి. ఆ బంతిని సముద్రంలోని పర్టిక్యులర్ స్పాట్ లోకి చేర్చడమో, లేదా అలాంటి వ్యవహారం నిర్వహించడమో కధాంశంగా తెలుస్తోంది. 

అఖిల్ సినిమా పోస్టర్ డిజైన్ ను దర్శకుడు రాజమౌళి కుమారుడు కార్తీక్ రూపొందించాడు. ఆ పోస్టర్ ఓ జపాన్ సినిమాకు అనుకరణ అని వార్తలు వినవచ్చాయి. చూస్తుంటే, పోస్టర్ నే కాదు, కథ కూడా ఎక్కడి నుంచో ఇన్ స్పయిర్ అయి తెచ్చినట్లే అనిపిస్తోంది. పోస్టర్ మాదిరిగా సినిమా కూడా విడుదలైతే అప్పుడు తెలుస్తుంది ఏ సంగతీ. అంతవరకు ఇవన్నీ గ్యాసిప్ లే.