Epaper
హారిక హాసిని సంస్థ చాలా పద్దతిగా వుంటుంది. అక్కడ చినబాబు తన లోకం తనదిగా, తన స్నేహితులు, తన సరదాలు తనవిగా వుంటారు. నాగవంశీ ఎంతసేపూ, మాంచి కాంబినేషన్ ఎలా సెట్ చేసుకోవాలా? అన్న తాపత్రయంతో వుంటారు. పిడివి ప్రసాద్ ఎంతసేపూ, ఏ విధంగా ఓ రూపాయి ఎక్కువకు మార్కెట్ చేసుకోవాలా అని చూస్తుంటారు. కానీ ఇలాంటి ట్రయాంగిల్ లోంచి కొన్ని విషయాలు బయటకు వస్తున్నాయి. దీనిపై ఆసక్తికరమైన గుసగుసలు వినిపిస్తున్నాయి.
ఎప్పటి నుంచో అదే సంస్థలో ఓ సినిమా డైరక్షన్ అవకాశం కోసం వేచి వున్న వ్యక్తి ఒకరు వున్నారట. ఆ వ్యక్తికి అవకాశం ఇవ్వాలనే వీరూ చూస్తున్నారట. అయితే ఆ కథ వీళ్లకు నచ్చింది కానీ, ఏ హీరోకి చెప్పించినా, ఏదో సమస్యతో ఒకే కావడంలేదు. అయినా పట్టువదలకుండా, ఆ కథను ఎలాగైనా తెరకెక్కించాలని చూస్తున్నారు. హీరోను ఎవరో ఒకరిని సెట్ చేయాలని చూస్తున్నారు.
కానీ సమస్య అక్కడే అని గుసగుసలు వినిపిస్తున్నాయి. ఈ డైరక్షన్ అవకాశం కోసం నిత్యం హారిక హాసిని ఆఫీస్ తో టచ్ లో వున్న ఆ వ్యక్తి అక్కడి సంగతులు అన్నీ, సరదాగా తన ఇండస్ట్రీ సన్నిహితులతో షేర్ చేసుకుంటున్నట్లు తెలుస్తోంది. దాంతో అక్కడి విషయాలన్నీ బయటకు పొక్కుతున్నాయట.
ఈ సంగతి తెలియక, హారిక హాసిని జనాలు ఏం జరుగుతోంది? ఎలా బయటకు వెళ్తున్నాయి? అని కిందామీదా అవుతున్నారట. అసలు లీకువీరులు తమ మధ్యనే వున్నారని తెలియక తలలు పట్టుకుంటున్నారట. ఇప్పుడైనా అక్కడ ఫైర్ వాల్ కట్టి, బ్లాక్ చేస్తారేమో చూడాలి.