దీపావళికి నో ‘మెగా’ లుక్స్

పండగ వస్తే సినిమా ఫ్యాన్స్ ఆనందంగా ఎదురుచూస్తారు, తమ తమ అభిమాన హీరోల సినిమాల ఫస్ట్ లుక్ లో, టీజర్ లో, ఇంకేమన్నా బయటకు విడుదల చేస్తారని. హీరోలు, నిర్మాతలు కూడా ఇలాంటి పండగల అకేషన్లు వాడుకోవాలని చూస్తారు. అయితే ఈ సారి దీపావళికి మెగాభిమానులకు మాత్రం నిరాశే. ఎందుకంటే ఏ మెగా హీరో ఫస్ట్ లుక్ వచ్చే సూచనలు కనిపించడం లేదు

పవన్ కళ్యాణ్-త్రివిక్రమ్ కాంబినేషన్ లో రెడీ అవుతున్న అజ్ఞాతవాసి సినిమా టీజర్ వస్తుందేమో అని పవర్ స్టార్ అభిమానులు ఆశగా చూసారు. కానీ అలాంటివి ఏవీ వదిలే పరిస్థితి లేదు. నవంబర్ 20లోగా సినిమా టాకీ ప్లస్ పాటలు పూర్తి చేయాలని సీరియస్ గా వున్నారు డైరక్టర్ త్రివిక్రమ్. అందువల్ల ఆయన మరే విషయం మీద దృష్టి పెట్టడం లేదు. అందువల్ల మరే విధమైన విషయాలపైనా ఆయన సీరియస్ గా ఆలోచించడం లేదు.

ఇక రామ్ చరణ్ నటిస్తున్న రంగస్థలం 1985 షూట్ సీరియస్ గా సాగుతోంది. పవర్ స్టార్-త్రివిక్రమ్ సినిమా పుణ్యమా అని ఈ సినిమా విడుదల సంక్రాంతి నుంచి సమ్మర్ దాకా వెళ్లిపోయింది. సమ్మర్ లో వచ్చే సినిమాకు ఇప్పటి నుంచి హడావుడి ఎందుకని ఊరుకున్నారు.

బన్నీ నటిస్తున్న నాపేరు సూర్య సినిమా షూటింగ్ స్పీడ్ గా సాగుతోంది. వక్కంతం వంశీ దర్శకుడు. ఈ సినిమాకు సంబంధించి టైటిల్ మినహా మరేదీ బయటకు రాలేదు. దీపావళికి వస్తుందేమో అనుకున్నారు కానీ అదీ లేనట్లే.

వరుణ్ తేజ సినిమా ఒకటి, సాయి ధరమ్ తేజ సినిమా ఒకటి నిర్మాణంలో వున్నాయి. వాటికీ ఏ విడుదలలు లేనట్లే. మొత్తం మీద ఈ దీపావళికి మెగా లుక్స్ ఏవీ లేనట్లే అనుకోవాలి.