పవన్ డబ్బులు పెడతాడు.. బండ్ల మేనేజ్ చేస్తాడట

పవన్ కల్యాణ్, నిర్మాత బండ్ల గణేష్ మధ్య అభిప్రాయ బేధాలు తొలిగిపోయిన విషయం తెలిసిందే. ఈమధ్య ఎక్కువగా పవన్ తో కనిపిస్తున్నాడు బండ్ల. ట్విట్టర్ లో కూడా పవన్ నా దేవుడంటూ తెగ హంగామా చేస్తున్నాడు. ఇదిలా ఉండగా మళ్లీ తన కోటరీలోకి వచ్చిన బండ్లను పవన్ ఈసారి మరింత స్పెషల్ గా చూస్తున్నాడట. కుదిరితే తను నిర్మించబోయే సినిమాల వ్యవహారాల్ని బండ్ల గణేష్ కు అప్పగించాలని అనుకుంటున్నాడట. 

పవన్ కల్యాణ్ కు ఇప్పటికే ఓ ప్రొడక్షన్ కంపెనీ ఉంది. పవన్ కల్యాణ్ క్రియేటివ్ వర్క్స్ పేరిట బ్యానర్ స్థాపించిన పవన్.. తన సొంత బ్యానర్ పై ఇప్పటికే కొన్ని సినిమాలకు సహ నిర్మాతగా వ్యవహరించాడు. మరోవైపు త్రివిక్రమ్ తో కలిసి నితిన్ హీరోగా ఓ సినిమా నిర్మించేందుకు కూడా రెడీ అవుతున్నాడు. ఇప్పుడీ హీరో సోలోగా తన సొంత బ్యానర్ పై సినిమాలు నిర్మిస్తాడట. ఆ నిర్మాణ బాధ్యతల్ని బండ్ల గణేష్ కు అప్పగించే ఆలోచనలో ఉన్నాడట. 

తన బ్యానర్ పై రామ్ చరణ్ ను హీరోగా పెట్టి ఓ సినిమా నిర్మిస్తానని ఇప్పటికే ప్రకటించాడు పవన్. చరణ్ తో పాటు సాయిధరమ్ తేజతో కూడా మరో సినిమా నిర్మించే ప్లాన్స్ లో ఉన్నాడట. ఈ రెండు సినిమాల నిర్మాణ బాధ్యతల్ని త్వరలోనే గణేష్ బండ్లకు అప్పగించబోతున్నాడని టాక్.