ప్రకాష్ రాజ్.. ఈసారి కెమేరా మెన్ తో?

హలోగురూ ప్రేమకోసమే. దిల్ రాజు నిర్మాణంలో నక్కిన త్రినాధరావు డైరక్షన్ రామ్ హీరోగా తయారవుతున్న సినిమా. ఈ సినిమా సెట్ మీద తరచు ఏదో ఒక చిన్న, చితక సంఘటన జరుగుతూనే వుంది. హీరోయిన్ అనుపమకు, ప్రకాష్ రాజ్ కు మధ్య, అలాగే డైరక్టర్ కు సహాయంగా వున్న మాటల రచయితతో కొందరు సెట్ జనాలకు మధ్య ఇలా.

లేటెస్ట్ గా ఇదే సినిమా సెట్ లో సినిమాటోగ్రాఫర్ విజయ్ కే చక్రవర్తికి, క్యారెక్టర్ ఆర్టిస్ట్ ప్రకాష్ రాజ్ కు మధ్య చిన్న గడబిడ నెలకొన్నట్లు తెలిసింది. ఓ సీన్ లో సినిమాటో గ్రాఫర్ వైడ్ యాంగిల్ ఫిక్స్ చేసుకున్నారు. కానీ అదే టైమ్ లో తనతో క్లోజ్ తీసేసి, వైడ్ ను డూప్ తో చేసుకోమని ప్రకాష్ రాజ్ చెప్పినట్లు బోగట్టా. కానీ సినిమాటో గ్రాఫర్, అలాకాదని, తాను వైడ్ ఫిక్స్ చేసుకున్నానని, ముందు వైడ్ లో యాక్ట్ చేసి, తరువాత క్లోజ్ కూడా చేయమని చెప్పినట్లు తెలుస్తోంది.

దీనిపై ఇద్దరి మధ్య చిన్న వాదన నెలకొన్నట్లు, దాని కారణంగా కొంతసేపు షూట్ ఆగిపోయినట్లు ఇండస్ట్రీలో వినిపిస్తోంది. విజయ్ కే చక్రవర్తి చాలా సినిమాలు దిల్ రాజు బ్యానర్ లో చేసిన సీనియర్. నాన్నకు ప్రేమతో కూడా అతగాడు చేసిన సినిమానే. కాస్త సీనియర్ కాబట్టి రాజీపడలేదు. దాంతో మాటా మాటా తప్పలేదు అని తెలుస్తోంది.