సీక్వెల్ అయితేనే హిట్ అవుతుందని నమ్ముతున్నారు..!

ఈ మధ్య కోలీవుడ్ పరిస్థితి ఏమంత బాగోలేదు. ఈ ఏడాది లో ఇప్పటి వరకూ నూటాయాభైకి పైగా సినిమాలు విడుదల అయ్యినా… చెప్పుకోదగిన హిట్స్ కొన్ని మాత్రమే! అవి కూడా పెద్ద హీరోల సినిమాలు ఒకటో రెండో హిట్ అయ్యాయి. అదే పెద్ద హీరోల సినిమాల్లో ఈ ఏడాది  చాలా వరకూ డిజాస్టర్ లుగా నిలిచాయి. సాధారణంగా వైవిధ్యమైన చిత్రాలకు తమిళ చిత్ర పరిశ్రమ పెట్టింది పేరు. అయితే అలాంటి ప్రయత్నాలేవీ ఈ సారి వర్కవుట్ కాలేదు. ఈ నేపథ్యంలో తమిళ దర్శకులు ఒకింత ఉక్కిరిబిక్కిరే అవుతున్నారు. దీంతో వాళ్లు సీక్వెల్స్ పై దృష్టి నిలిపినట్టుగా తెలుస్తోంది.

ప్రస్తుతం రోబో-2 పై దృష్టి పెట్టారు రజనీకాంత్ , శంకర్ లు. అలాగే కమల్ హాసన్ విశ్వరూపం-2 పెండింగ్ లో ఉంది. ఇదే సమయంలో కమల్ తన పాత సినిమాలకు కొన్నింటికి సీక్వెల్స్ గురించి ఆలోచిస్తున్నాడు. ఈ జాబితా పెద్దగానే ఉంది. అలాగే నెపోలియన్ నటించిన ఒక పాత సినిమాకు కమల్ సీక్వెల్ రూపొందించే ప్రయత్నంలో ఉన్నట్టుగా తెలుస్తోంది. ఇక మరోవైపు మణిరత్నం అలనాటి సూపర్ హిట్ 'అగ్నినక్షత్రం' సినిమాకు కూడా సీక్వెల్ ఆలోచన ఉన్నట్టుగా తెలుస్తోంది. ఇక లారెన్స్ వంటి వాళ్లు తమ హిట్ సినిమాలకు సీక్వెల్ ల మీద సీక్వెల్స్ తీసుకొంటూ పోతున్నారు.

వీళ్లే కాదు… శింబూ కూడా దిక్కుతోచని పరిస్థితుల్లో సీక్వెల్ జపాన్ని పఠిస్తున్నాడు. “మన్మథ'' సినిమాకు సీక్వెల్ ను రూపొంచాలనే ఉబలాటంతో ఉన్నాడు ఈ హీరో. ఈ మధ్య శింబు సినిమాలేవీ అంతగా ఆడలేదు. ఈ నేపథ్యంలో అతడు తన సూపర్ హిట్ సినిమాకు కొనసాగింపు తీయడం ద్వారా ఊరట పొందాలని భావిస్తున్నాడు. ఓవరాల్ గా ఈ సంవత్సరం హిట్స్ రేషియో చాలా తక్కువగా ఉన్న నేపథ్యంలో కోలీవుడ్ లో సీక్వెల్స్ ఆసక్తులు అధికంగా కనిపిస్తున్నాయి. అవి మాత్రమే ఇప్పుడు తమను గట్టించగలవనే భావనతో కనిపిస్తున్నారు అక్కడి స్టార్లు.