మళ్లీ సైరా వాయిదా: కారణం సుకుమార్?

సైరా రెండో షెడ్యూల్ ఇప్పటికి 2సార్లు వాయిదాపడింది. లెక్కప్రకారం రేపట్నుంచి ఈ సినిమా సెకెండ్ షెడ్యూల్ మొదలుకావాలి. కానీ మరోసారి పోస్ట్ పోన్ అయింది. ప్రస్తుతం చిరంజీవి ఖాళీగానే ఉన్నారు. దర్శకుడు కూడా సైరా పనిమీదే ఫుల్ ఫోకస్ తో ఉన్నాడు. కానీ జరగాల్సిన షెడ్యూల్ మాత్రం పోస్ట్ పోన్ అయింది. ఈసారి కారణం యూనిట్ తో ఎలాంటి సంబంధం లేని సుకుమార్.

అవును.. రంగస్థలం సినిమాను చెక్కుతున్న సుకుమార్ ఆ మూవీ షూటింగ్ కంప్లీట్ చేశాడని అంతా అనుకున్నారు. కానీ తాపీగా మరికొన్ని రోజులు షూట్ ప్లాన్ చేశాడు సుక్కూ. ఈ సినిమాకు రత్నవేలు సినిమాటోగ్రాఫర్. ఇతడే సైరా సినిమాకు కూడా సినిమాటోగ్రాఫర్ గా వ్యవహరిస్తున్నాడు. సుకుమార్ ఎఫెక్ట్ తో సైరాకు టైం కేటాయించలేకపోతున్నాడు రత్నవేలు. అందుకే సైరా సెకెండ్ షెడ్యూల్ ను మరోసారి వాయిదా వేశారు.

తాజా సమాచారం ప్రకారం సైరా సెకెండ్ షెడ్యూల్ మార్చి మొదటి వారానికి వాయిదాపడింది. అటు బిగ్ బి అమితాబ్ బచ్చన్, హీరోయిన్ నయనతార కూడా మార్చి మొదటి వారం లేదా రెండో వారం నుంచి సెట్స్ పైకి వస్తామని కాల్షీట్లు ఎడ్జెస్ట్ చేశారట. సో.. నెక్ట్స్ షెడ్యూల్ నుంచి సైరా ఊపందుకుంటుందన్నమాట.  

అయితే సెట్స్ పైకి వచ్చినప్పటికీ సైరా షూటింగ్ కు మరోసారి బ్రేకులు పడే పరిస్థితులు కనిపిస్తున్నాయి. ఎందుకంటే.. మార్చి 30న రంగస్థలం రిలీజ్ ఉంది. ఆ సినిమా ప్రచార కార్యక్రమాల్లో రామ్ చరణ్ పాల్గొనాలి. ఏదో ఒక ఈవెంట్ లో చిరంజీవి కూడా కనిపించడం గ్యారెంటీ.