తారా చౌదరి సమర్పించు…

తారా చౌదరి.. పరిచయం అక్కర్లేని పేరిది. అనేక వివాదాలతో మీడియాలో పబ్లిసిటీ దక్కించుకోవవడం ఆమెకు వెన్నతో పెట్టిన విద్య. ఒకటా? రెండా? లెక్కలేనన్ని వివాదాలున్నాయి ఆమె చుట్టూ. సినీ రచయిత చిన్ని కృష్ణతో ఓ వివాదం, ఆ తర్వాత ఓ ప్రముఖ రాజకీయ నాయకుడితో మరో వివాదం.. ఇలా చాలానే గొడవలతో తారా చౌదరి మీడియాకెక్కింది. తన వద్ద చాలామంది పోలీసు అధికారుల జాతకాలున్నాయంటూ తారా చౌదరి మీడియాకెక్కి చేసిన హంగామా అంతా ఇంతా కాదు.

ఇప్పుడు ఈ తారా చౌదరి ఓ సినిమా తీస్తానంటూ మరోమారు మీడియాలో హాట్‌ టాపిక్‌ అయ్యింది. ఓ భారీ బడ్జెట్‌ సినిమా త్వరలో తెరకెక్కించబోతున్నాననీ, ఆ తర్వాత తన జీవిత చరిత్రనే సినిమాగా తెరకెక్కిస్తానని తారా చౌదరి చెప్పుకొచ్చింది. రియల్‌ ఎస్టేట్‌ వ్యాపారం బాగా కలిసొచ్చి, సినిమా నిర్మాతనవుతున్నానని తారా చౌదరి చెబుతుండడం గమనార్హం.

నిజంగానే తారా చౌదరి నిర్మాతగా మారి తన ఆత్మకథన సినిమాగా తెరకెక్కిస్తే, ఆ సినిమాలో రాజకీయ, సినీ రంగాలకు చెందిన వ్యక్తుల తెరవెనుక వ్యవహారాలేమన్నా తెరపై కన్పిస్తాయా.? సినిమా పేరు చెప్పి మరో వివాదానికి తారా చౌదరి తెరతీస్తోందా.? ఇదంతా కేవలం పబ్లిసిటీ స్టంటేనా.? ఏమో మరి.. కొద్ది రోజులు ఆగితే తెలుస్తుంది.