మెగా లైనప్ మరోసారి మారబోతోందా?

కొన్నేళ్ల కిందటి సంగతి. భోళాశంకర్ ఫ్లాప్ అయిన తర్వాత చిరంజీవి తన లైనప్ మొత్తం పూర్తిగా మార్చేశారు. వెంకీ కుడుములతో చేయాల్సిన సినిమా ఆపేశారు. కూతురు నిర్మాతగా కల్యాణకృష్ణ దర్శకత్వంలో చేయాల్సిన ప్రాజెక్టును పక్కనపెట్టారు.

దీంతో ఆయన సినిమాల ఆర్డర్ మారిపోయింది. ఒకప్పుడు మెగా155, మెగా156 అనే హ్యాష్ ట్యాగ్స్ తో పాపులరైన చిరంజీవి సినిమాలు ఆ తర్వాత నంబరింగ్ ను పక్కనపెట్టేశాయి. వశిష్ఠ దర్శకత్వంలో చేస్తున్న సినిమాకు కూడా టైటిల్ పెట్టకముందు మెగా157 అంటూ ప్రస్తావించినప్పటికీ, ఆ తర్వాత ఆ నంబరింగ్ ను వాళ్లు కూడా పక్కనపెట్టారు. విశ్వంభర టైటిల్ ఎనౌన్స్ చేసిన తర్వాత మెగా157 అనే హ్యాష్ ట్యాగ్ పూర్తిగా సైడ్ అయిపోయింది.

ఇలా చిరంజీవి సినిమాల ఆర్డర్ పై కన్ఫ్యూజన్ కొనసాగుతున్న టైమ్ లో మరోసారి మెగా157 అంటూ పోస్టర్ పడింది. ఇది అనీల్ రావిపూడి సినిమా మేటర్.

ఈరోజు ఈ సినిమా లాంఛింగ్ పెట్టుకున్నారు. చిరంజీవి-అనీల్ రావిపూడి కాంబోలో వస్తున్న ఈ సినిమాను మెగా157గా వ్యవహరిస్తున్నారు. దీంతో విశ్వంభరపై అనుమానాలు మొదలయ్యాయి. ముందుగా అనీల్ రావిపూడి సినిమా రిలీజైన తర్వాతే, విశ్వంభర రిలీజ్ చేస్తారా అనే డౌట్స్ తెరపైకొచ్చాయి.

నిజానికి ఈ విషయంలో కన్ఫ్యూజన్ అక్కర్లేదు. అనీల్ రావిపూడి సినిమాకు ఏ నంబర్ ఇచ్చుకున్నప్పటికీ, ముందుగా రిలీజయ్యేది విశ్వంభర మాత్రమే. సంక్రాంతి బరి నుంచి తప్పుకున్న ఈ సినిమాను జులై 24 లేదా ఆగస్ట్ 21న విడుదల చేయాలని అనుకుంటున్నారు.

విశ్వంభర రిలీజైన 5-6 నెలల గ్యాప్ లో అనీల్ రావిపూడి సినిమా సంక్రాంతి కానుకగా థియేటర్లలోకి వస్తుంది. విశ్వంభర సినిమా విడుదల తేదీపై ప్రకటన వస్తే, అనీల్ రావిపూడి సినిమా నంబర్ ఎంతనేది క్లారిటీ వస్తుంది. అప్పటివరకు ఈ కన్ఫ్యూజన్ తప్పదు.