Epaper
సినిమాల్లేక ఖాళీ అయిన దర్శకులున్నారు. ఫ్లాపులిచ్చి పక్కకెళ్లిపోయిన డైరక్టర్లు కూడా ఉన్నారు. అవకాశాల్లేక వెనకబడిన దర్శకులు కూడా ఉన్నారు. కానీ అన్నీ ఉండి కెరీర్ లో గ్యాప్ వస్తే ఏమనాలి. బహుశా అలాంటి వ్యక్తిని నీలకంఠ అనాలేమో. బ్యాడ్ లక్.. ఈ దర్శకుడి కెరీర్ లో కళ్లముందే 9 ఏళ్ల గ్యాప్ వచ్చేసింది.
నేషనల్ అవార్డ్ అందుకున్న దర్శకుడాయన. ఆయనలో విషయం ఉందని ఎవరైనా అంగీకరిస్తారు. అలాంటి దర్శకుడు, ఏ ప్రాజెక్టు చేపడితే అది ఆగిపోయింది. అలా ఒకటి కాదు, రెండు కాదు.. ఈ 9 ఏళ్లలో 5 సినిమాలు ఆగిపోయాయి. ఇంతకంటే బ్యాడ్ లక్ ఇంకేముంటుంది.
“నిజానికి 2 సినిమాలు స్టార్ట్ అవ్వాలి, చాలా వర్క్ చేశాను, కానీ అవి ప్రారంభంకాలేదు. మాయ మూవీ తర్వాత మహేష్ భట్ నుంచి ఆఫర్ వచ్చింది. ఈ సినిమాను హిందీలో చేయాలని ఆయన అన్నారు. సైన్ కూడా చేశాను, ఆఖరి నిమిషంలో ఆగిపోయింది. ఆ తర్వాత 2 సినిమాలు ఆల్ మోస్ట్ షూటింగ్ స్టేజ్ కు వచ్చి అనుకోని కారణాల వల్ల ఆగిపోయాయి. ఆ తర్వాత మలయాళం సినిమా చేశాను. అలా టాలీవుడ్ లో 9 ఏళ్లు గ్యాప్ వచ్చేసింది.”
ఇలా తన బాధను నవ్వుకుంటూ మీడియాతో పంచుకున్నారు నీలకంఠ. ఈయన దర్శకత్వంలో రావాల్సిన క్వీన్ అనే సినిమా మధ్యలో ఆగిపోయింది. ఆ టైమ్ లో తమన్న-నీలకంఠ గొడవ పడ్డారనే ప్రచారం జరిగింది. చాలామందికి ఈ ఒక్క సినిమా గురించి మాత్రమే తెలుసని, కానీ తన కెరీర్ లో ఇలాంటి సినిమాలు చాలానే ఆగిపోయాయంటూ లిస్ట్ చెప్పుకొచ్చారు నీలకంఠ.
ఈ సినిమాలతో పాటు.. వెంకటేష్ తో చేయాల్సిన వివేకానంద సిరీస్ కూడా ఆగిన విషయాన్ని బయటపెట్టారు. వెంకటేష్ తో వివేకానంద సిరీస్ కోసం అన్నీ సిద్ధం చేసుకున్నానని, కానీ అది కూడా కార్యరూపం దాల్చలేదంటూ బాధపడ్డారు.
ఎట్టకేలకు 9 ఏళ్ల సుదీర్ఘ విరామం తర్వాత సర్కిల్ అనే సినిమాతో ప్రేక్షకుల ముందుకొస్తున్నారు ఈ దర్శకుడు. విభిన్న సినిమాలు తీయడం తనకు ఇష్టమని, ప్రస్తుతం ఆడియన్స్ కూడా విభిన్న చిత్రాలు కోరుకుంటున్నారని, కాబట్టి సర్కిల్ మూవీ సక్సెస్ అవుతుందని నమ్మకంగా చెబుతున్నారు నీలకంఠ.