Epaper
బాలయ్య, బోయపాటి కాంబినేషన్ లో ఇక సినిమా ఉండదని అనుకున్నారంతా. బోయపాటికి ఇవ్వాల్సిన అవకాశాన్ని ఎప్పుడైతే కేఎస్ రవికుమార్ కు ఇచ్చాడో అప్పుడే వీళ్ల కాంబినేషన్ పై అనుమానాలు పెరిగిపోయాయి. వినయ విధేయరామ దెబ్బకు బోయపాటిని ఇక బాలయ్య పట్టించుకోడని పుకార్లు వచ్చాయి. కానీ బాలయ్య మాత్రం మరోసారి బోయపాటికి అవకాశం ఇచ్చాడు.
అవును.. బాలయ్య-బోయపాటి కాంబినేషన్ లో మూవీ లాక్ అయింది. నవంబర్ నుంచి ఇది సెట్స్ పైకి వస్తుంది. గతంలో బోయపాటితో జయజానకి నాయక సినిమాను నిర్మించిన మిర్యాల రవీంద్రరెడ్డి, ఈ ప్రాజెక్టును సెట్స్ పైకి తీసుకురాబోతున్నాడు. సింహా, లెజెండ్ సినిమాల తరహాలోనే కంప్లీట్ యాక్షన్ సబ్జెక్ట్ తో రాబోతోంది బోయపాటి కొత్త సినిమా.
ప్రస్తుతం కేఎస్ రవికుమార్ దర్శకత్వంలో ఓ సినిమా చేస్తున్నాడు బాలయ్య. థాయ్ లాండ్ లో ఈ సినిమా ఫస్ట్ షెడ్యూల్ పూర్తిచేశారు. 20 రోజుల పాటు జరిగిన ఈ షెడ్యూల్ లో రెండు పాటలు, కొంత టాకీ, ఒక భారీ యాక్షన్ ఎపిసోడ్ షూటింగ్ పూర్తిచేశారు. రెండో షెడ్యూల్ హైదరాబాద్ లోనే మొదలవుతుంది. ఈ సినిమా కంప్లీట్ అయిన వెంటనే బోయపాటితో కలిసి సినిమా సెట్స్ పైకి వెళ్తాడు బాలయ్య.