సినిమా జీఎస్టీ తెలంగాణ పాలు

తెలంగాణలో సినిమా రంగం మీద 100 కోట్ల వరకు జీఎస్టీ వసూళ్లు వుంటున్నాయని, కానీ ఆంధ్రలో మాత్రం గట్టిగా పాతిక, ముఫై కోట్లు కూడా వుండడం లేదని ఇటీవల ఎక్కువగా వినిపిస్తోంది. దీనికి కారణం థియేటర్ల దగ్గర లెక్కలు తేడా అని ఓ టాక్ వుంది. అయితే ఇంట్రస్టింగ్ సంగతి మరొకటి వినిపిస్తోంది.

ఆంధ్రలో వస్తున్న సినిమా రంగం మీద జీఎస్టీ వసూళ్ల నుంచి ఇన్ పుట్ క్రెడిట్ రూపంలో తెలంగాణకు వెళ్లిపోతున్న మొత్తం ఎక్కవగా వుంటోందన్నది ఆ పాయింట్.  తెలంగాణ, ఆంధ్ర విడిపోయిన తరువాత ఈ తరహా ఆదాయాన్ని కూడా 60-40 రేషియోలో పంచుకోవాలన్న విషయం పక్కన పడిపోయింది.

ఓ నిర్మాత ఓ సినిమా తీసారు అనుకుందాం.  నిర్మాత జీఎస్టీ అన్ని విధాలా పే చేస్తారు. కానీ ఆయనకు ఇన్ పుట్ క్రెడిట్ రావాలికదా? అది ఎక్కడి నుంచి వస్తుంది. ఆంధ్రలో టికెట్ ల మీద వసూలైన జీఎస్టీ నుంచి రావాల్సి వుంటుంది.  

ఎగ్జిబిటర్ల నుంచి డిస్ట్రిబ్యూటర్లకు, వాళ్ల నుంచి నిర్మాతకు. డిస్ట్రిబ్యూటర్లు, ఎగ్జిబిటర్లు ఆంధ్రలో వుంటారు. నిర్మాతల అక్కౌంట్ హైదరాబాద్ లో వుంటుంది. ఇదే ఫైనల్ అక్కౌంట్. అక్కడ వస్తోంది అసలు సమస్య అని ఓ నిర్మాత వివరించారు. 

రాష్ట్ర విభజన తరువాత అన్నీ పంచుకున్నట్లే టాలీవుడ్ మీద వచ్చే ఆదాయాన్ని కూడా పంచమని కేంద్రాన్ని కోరి వుంటే అది వేరుగా వుండేదని పలువురి అభిప్రాయం. ఇప్పటికైనా మించిపోయింది లేదేమో?