‘కూలి’తో వార్ డిక్లేర్!

ఆగస్ట్ నెలలో మంచి రసవత్తరమైన సినిమా పోరు తెరపైకి రాబోతోంది. వార్ 2, కూలి సినిమాలు ఒకేరోజు విడుదలై, బాక్సాఫీస్ దగ్గర ఢీకొనబోతున్నాయి. ఇది అన్ ఎక్స్ పెక్టెడ్ వార్. కూలి సినిమాకు మంచి బజ్ వుంది. బోలెడు మంది టాప్ స్టార్‌లు, లోకేష్ కనకరాజ్ పేర్లు కలిసి ఆ సినిమా క్రేజ్ పెంచాయి. తెలుగు నాట థియేటర్ హక్కులు 42 నుంచి 45 కోట్లు పలుకుతున్నాయి. ఇలాంటి టైమ్‌లో వార్ 2 సినిమా డేట్ కే కూలి సినిమా విడుదల డేట్ వేసారు.

ఎంత కాదన్నా, ఎంత హిందీ డబ్బింగ్ అయినా, వార్ 2 సినిమాకు తెలుగు నాట ఓపెనింగ్ ఉంటుంది. ఎందుకంటే అందులో ఎన్టీఆర్ ఒక హీరోగా నటిస్తున్నారు. హృతిక్ రోషన్ మరో హీరో. మాస్ యాక్షన్ ఎంటర్‌టైనర్ అది. దాంతో తెలుగు నాట కూలి పోటీ పడాలి అంటే అద్భుతమైన టాక్ రావాల్సి ఉంటుంది. ఇప్పటి వరకు పలికిన 42 కోట్ల బేరం ఇకపై పలకడం కష్టమే. ఎందుకంటే ఈ కాంపిటీషన్‌లో రావడం అంటే బిజినెస్‌కు ఎఫెక్ట్ అయిపోతుంది.

ఏ సినిమా ఎలా ఉంటుందో అన్నది విడుదలైన తరువాత తెలిసేది. ముందుగా అయితే వార్ 2 కు ఎడ్జ్ ఉంటుంది. కానీ వార్ 2 అన్నది రెగ్యులర్ హెవీ కమర్షియల్ యాక్షన్ ఫార్మాట్‌లో ఉండొచ్చు. కానీ కూలి అలా కాదు. లోకేష్ కనకరాజ్ టేకింగ్ వేరే లెవెల్‌లో ఉంటుంది. అదే ఆ సినిమాకు రక్ష.