దిల్ రాజు పై మహేష్ బాబు ఆగ్రహం?

ఇండస్ట్రీలో ఓ ఇంట్రస్టింగ్ గ్యాసిప్ వినిపిస్తోంది. నిర్మాత, డిస్ట్రిబ్యూటర్ దిల్ రాజుకు హీరో మహేష్ కాస్త ఆగ్రహంతో వున్నారన్నది ఆ గ్యాసిప్.. ఇది నిజమో, కాదో పక్కాగా తెలియదు. మహేష్ విదేశాల్లో వున్నారు. దిల్ రాజు విదేశాల్లో వుండి వచ్చారు. వినిపిస్తున్న విషయం మాత్రం లాజికల్ గానే వుంది.

సర్కారు వారి పాట విడుదలైన రెండు వారాలకు ఎఫ్ 3 విడుదలయింది. అప్పటి వరకు నైజాంలో ఎక్కువ రేట్లు తెచ్చుకుని సినిమా విడుదల చేయడం, లేదా ఫ్లెక్సీ రేట్ల ప్రాక్టీస్ ను దిల్ రాజే ప్రారంభించారు. కానీ ఎఫ్ 3 విషయంలో వారం ముందుగా తక్కువ రేట్లు అంటూ ప్రచారం ప్రారంభించారు. 

సడెన్ గా ఇలా చేయడం అన్నది నైజాంలో సర్కారువారిపాట సినిమా కలెక్షన్లను దెబ్బతీసింది అన్న పాయింట్ ను మహేష్ కు ఎవరో చేరవేసినట్లు బోగట్టా. ఫ్యామిలీ సినిమా అది కూడా తక్కువ రేట్లు కావడంతో మధ్యతరగతి జనం ఎఫ్ 3 వైపు మొగ్గు చూపారని ఓ అభిప్రాయం మహేష్ కు చేరింది.

సర్కారువారిపాట నైజాం డిస్ట్రిబ్యూటర్ కూడా దిల్ రాజునే. 29 కోట్ల నాన్ రిటర్న్ బుల్ అడ్వాన్స్ ఇచ్చారు. జిఎస్ టీని నిర్మాత అందించారు. అందువల్ల ఎఫ్ 3 నాటికే సర్కారు వారి పాట దాదాపు బ్రేక్ ఈవెన్ అయిపోయింది. 

చలామణీలో వున్న ఫిగర్ లు ఎలా వున్నా, నైజాంలో సర్కారు వారిపాట 28 కోట్ల దగ్గర ఆగిపోయందని, ఇండస్ట్రీ వర్గాల బోగట్టా. ఇక ఎఫ్ 3 కి అలా చేయడంతో మిగిలిన వారు కూడా అదే దారి పట్టాల్సి వచ్చింది. ముఖ్యంగా మహేష్ బాబు నిర్మించిన మేజర్ సినిమాకు కూడా రేట్లు తగ్గించాల్సి వచ్చింది. అందుకే అదే స్ట్రాటజీని మేజర్ వాడింది. పైగా ఎఫ్ 3 కన్నా తక్కువ రేట్లు పెట్టారు.

మొత్తం మీద గ్యాసిప్ నో, నిజమో…మహేష్ బాబు డిస్ట్రిబ్యూటర్ దిల్ రాజు మీద ఆగ్రహంతో వున్నారనే వార్త వినిపించడం ప్రారంభమైంది. తివిక్రమ్-మహేష్ సినిమా డిస్ట్రిబ్యూషన్ కూడా దిల్ రాజే చేయాల్సి వుంటుంది లెక్క ప్రకారం. బ్యానర్ ప్రకారం. ఒక వేళ చేయి మారితే ఈ గ్యాసిప్ పక్కా నిజం అనుకోవాల్సి వుంటుంది.