ఇది ఆరెంజ్ కాదు.. అదిరిపోయే పాన్ ఇండియా మూవీ

'మళ్లీ రావా' అనే సినిమాతో దర్శకుడిగా పరిచయమయ్యాడు గౌతమ్ తిన్ననూరి. ఆ తర్వాత జెర్సీ అనే ఎమోషనల్ కంటెంట్ ఉన్న మూవీని తెరకెక్కించాడు. 

ప్రస్తుతం ఇదే సినిమా హిందీ రీమేక్ తో బిజీగా ఉన్నాడు. ఈ సినిమా తర్వాత రామ్ చరణ్ హీరోగా సినిమా చేయబోతున్నాడు. సో.. ఇతడి నుంచి రాబోయే నెక్ట్స్ మూవీ కూడా సున్నితమైన భావోద్వేగాలు లేదా ఆరెంజ్ టైపులో లవ్ స్టోరీ అయి ఉంటుందని అంతా అనుకుంటున్నారు.

రామ్ చరణ్ తో చేయబోయే సినిమాపై క్లారిటీ ఇచ్చాడు గౌతమ్ తిన్ననూరి. రామ్ చరణ్ తో పాన్-ఇండియా సినిమా చేయబోతున్నానని, పైగా అది లవ్ సబ్జెక్ట్ కాదని తేల్చిచెప్పాడు. పాన్ ఇండియా మూవీ కాబట్టి కచ్చితంగా యాక్షన్ సబ్జెక్ట్ అయి ఉంటుందనే ప్రశ్నకు.. 'దాదాపు అలాంటిదే, మీరే చూస్తారుగా' అంటూ ముక్తసరిగా సమాధానమిచ్చాడు ఈ దర్శకుడు.

మొత్తానికి చరణ్ తో చేయబోయే సినిమాతో మరో కొత్త జానర్ టచ్ చేయబోతున్నాడు ఈ దర్శకుడు. మరోవైపు ఈ సినిమాలో చిరంజీవి నటించబోతున్నారనే పుకార్లకు కూడా చెక్ పెట్టాడు తిన్ననూరి. తమ సినిమాలో చిరంజీవికి సూటయ్యే రోల్ లేదని స్పష్టంచేశాడు.

యూవీ క్రియేషన్స్, ఎన్వీఆర్ సినిమా బ్యానర్లపై ఈ సినిమా రాబోతోంది. ప్రస్తుతం శంకర్ దర్శకత్వంలో ఓ సినిమా చేస్తున్నాడు చరణ్. ఆ మూవీ కొలిక్కి వచ్చిన వెంటనే గౌతమ్ తిన్ననూరి ప్రాజెక్ట్ స్టార్ట్ అవుతుంది.