Advertisement

Advertisement


Home > Movies - Movie News

ఎఫ్ 3 మూడు రెట్లు వినోదం..వెంకీ

ఎఫ్ 3 మూడు రెట్లు వినోదం..వెంకీ

అనిల్ రావిపూడి…వెంకీ…వరుణ్ కాంబినేషన్ లో తయారైన ఎఫ్ 3 సినిమా విడుదల దగ్గరకు వచ్చేసింది. ఈ నేపథ్యంలో హీరో వెంకటేష్ మీడియాతో మాట్లాడారు. 

'ఎఫ్ 2 పెద్ద విజయం సాధించింది. ఆ సినిమాని, అందులో పాత్రలని ప్రేక్షకులంతా ఎంతో అభిమానించారు. ఎఫ్ 3 నుండి ఖచ్చితంగా అంతకంటే ఎక్కువ వినోదం కోరుకుంటారు. ప్రేక్షకుల అంచనాలకు ఏ మాత్రం తగ్గకుండా ఎఫ్ 2కి ట్రిపుల్ డోస్ వినోదం ఎఫ్ 3లో వుంటుంది' అని ఆయన ఈ సందర్భంగా అన్నారు హీరో వెంకటేష్ మీడియాతో పంచుకున్న 'ఎఫ్ 3' విశేషాలివి.

మీ ఇమేజ్, స్టార్ డమ్ అన్నీ పక్కన పెట్టి ఎఫ్ 3 చేశారని దర్శకుడు చెప్పారు.

నా ప్రతీ సినిమాని మొదటి సినిమాగానే భావిస్తా. ప్రతీ సినిమాకి అలానే కష్టపడతా. నా స్టార్ డమ్ ఇమేజ్ ని ఎప్పుడూ క్యారీ చేయను. ముఖ్యంగా కామెడీ ఎంటర్ టైనర్లు చేసినప్పుడు ఇలాంటి ఇమేజ్ ని క్యారీ చేయకూడదు. అప్పుడే నేచురల్ ఫ్లో బయటికివస్తుంది. ఇంట్లో ఇల్లాలు వంటిట్లో ప్రియురాలు, అబ్బాయిగారు, నువ్వు నాకు నచ్చావ్, మల్లీశ్వరి.. ఇలా ఎన్నో చిత్రాలు ఎలాంటి ఇమేజ్ లెక్కలు వేయకుండా చేసినవే. సినిమా చేసినప్పుడు ఎక్కువ అలోచించను. సినిమాని నా పాత్రని ఎంజాయ్ చేస్తాను. బహుశా అనిల్ రావిపూడికి కూడా ఇదే అనిపించుటుంది. ఎఫ్ 3 అవుట్ పుట్ అద్భుతంగా వచ్చింది.

నారప్ప, దృశ్యం తర్వాత ఎఫ్ 3 లాంటి ఎంటర్ టైనర్ చేయడం ఎలా అనిపించింది?

నారప్ప, దృశ్యం రెండూ సీరియస్ సినిమాలు. కరోనా లాక్ డౌన్ కారణంగా ఓటీటీలో విడుదలయ్యాయి. ఎఫ్ 3తో మళ్ళీ థియేటర్ ఆడియన్స్ ని కలవడం ఆనందంగా వుంది. కామెడీ అనగానే ఒక ప్రత్యకమైన ఎనర్జీ వచ్చేస్తుంది. కాలేజీ రోజుల్లో ఉన్నట్లే అనిపిస్తుంది. నేను సహజంగానే అందరితోనూ సరదాగా ఉంటా. న‌న్ను ఇలా చూడటానికి ప్రేక్షకులు కూడా ఇష్టపడతారు. రెండేళ్ళ గ్యాప్ తర్వాత ఎఫ్ 3లాంటి బిగ్ ఎంటర్ టైనర్ తో రావడం ఆనందంగా వుంది. ఫ్యామిలీ తో కలసి ఇలాంటి ఎంటర్ టైనర్లు చూడటంలో ఓ కిక్ వుంటుంది. ఎఫ్ 2పెద్ద విజయం సాధించింది. ఆ సినిమాని, పాత్రలని ప్రేక్షకులంతా అభిమానించారు. ఎఫ్ 3 నుండి ఖచ్చితంగా అంతకంటే ఎక్కువ వినోదం కోరుకుంటారు. ప్రేక్షకుల అంచనాలకు ఏ మాత్రం తగ్గకుండా ఎఫ్ 2కి ట్రిపుల్ డోస్ వినోదం ఎఫ్ 3లో వుంటుంది.

ఎఫ్ 2కంటే ఎఫ్ 3లో చాలా హుషారుగా కనిపిస్తున్నారు? సీక్రెట్ ఏమిటి?

ఏదైనా స్క్రిప్ట్ ప్రకారమే వుంటుంది. ఇచ్చిన స్క్రిప్ట్ కి డబుల్ డోస్ ఇవ్వడానికి ప్రయత్నిస్తాను. అయితే ఏదీ ప్లాన్ చేసుకోను. స్పాంటేనియస్ గా వస్తుంటాయి. కొన్నిసార్లు నేను చేసింది మర్చిపోతాను. దర్శకుడు అనిల్ మళ్ళీ గుర్తు చేసి అది బావుంది మళ్ళీ చేయండని అడుగుతారు. ఇంట్లో ఇల్లాలు వంటిట్లో ప్రియురాలు, నువ్వు నాకు నచ్చావ్, మల్లీశ్వరి..ఇలా ఏ సినిమా తీసుకున్నా.. పెద్ద ప్లాన్ చేయడం అంటూ ఏమీ వుండదు. స్పాంటేనియస్ గానే వుంటుంది.

ఎఫ్ 3 డబ్బు చుట్టూ తిరిగే కథ. అలాంటి కథలో చేయడం ఎలా అనిపించింది?

త్వరగా డబ్బులు సంపాదించడం, పెద్ద కలలు కనడం, అవకాశాలు సృష్టించడం మానవుని సహజ లక్షణం. అందరికీ ఆశ వుంటుంది. ఈ క్రమంలో బోలెడు సమస్యలు ఎదురౌతాయి. బోలెడు పాఠాలు నేర్చుకుంటాం. ఆ పాఠాలతో మారుతాం. ఒకవేళ మారకపోతే .. మళ్ళీ అవే సమస్యల చట్టూ తిరగాల్సివుంటుంది.

ఎఫ్ 3పాత్ర మీ రియల్ లైఫ్ కి ఎంత దగ్గరగా వుంటుంది?

పూర్తి ఆపోజిట్ గా వుంటుంది (నవ్వుతూ).

మీ కామెడీకి గైడ్ ఎవరైనా వున్నారా?

నాకు చిన్నప్పటి నుండి అబ్జర్వేషన్ వుంది. ప్రతిది బాగా అబ్జర్వ్ చేస్తాను. ప్రయాణాలు చేసినప్పుడు, నలుగురితో కలిసినప్పుడు.. వారి ఎక్స్ ప్రెషన్స్, బాడీ లాంజ్వేజ్ ని గమనిస్తుంటాను. ఇక బోలెడు మంది గొప్ప కమెడియన్లు వున్నారు. ప్రతి ఒక్కరి దగ్గర ఏదో ఒక విషయాన్ని నేర్చుకుంటాం.

డైలాగ్స్ లో కూడా స్పాంటీనిటీని యాడ్ చేసి స్పాట్ లో ఇంప్రవైజ్ చేస్తారా?

ప్రతి డైలాగ్ ని ఇంప్రవైజ్ చేయాల్సిందే. కొన్ని సార్లు వాయిస్ లోనే ఒకరకమైన ఫన్ పుడుతుంది. కొందరు మాట్లాడితేనే నవ్వొస్తుంది. అల్లు రామలింగయ్య గారు టిపికల్ వాయిస్ తో నవ్విస్తారు. అలాగే జానీ లీవర్ లాంటి నటులు కూడా తమ వాయిస్ తోనే ఆకట్టుకుంటారు.

వరుణ్ తేజ్ గురించి ఎం చెప్తారు?

ఎఫ్ 2 లో మా కాంబినేషన్ ని ప్రేక్షకులు చాలా ఎంజాయ్ చేశారు. ఎఫ్ 3లో వరుణ్ తేజ్ పాత్ర ఇంకా బావుంటుంది. చాలా అద్భుతంగా చేశాడు. వరుణ్ తో వండర్ ఫుల్ జర్నీ.

డబ్బుకి మీరిచ్చే ప్రాధాన్యత ఏమిటి?

డబ్బు అందరికీ కావాలి. దానికి కోసం అందరూ సరైన మార్గంలో కష్టపడాలి. ఈ నేచర్ మనకు కావాల్సింది ఇస్తుంది. లేనిదాని కోసం ఎక్కువ తాపత్రయపడకూడదు. వున్నదాన్ని సక్రమంగా వాడుకోవాలి. ఆనందంగా బ్రతకాలి.

ఎఫ్ 2కి ఎఫ్ 3మధ్య ఎలాంటి తేడా వుంటుంది?

ఎఫ్ 3లో మోర్ ఫన్ యాడ్ అయ్యింది. చాలా మంది నటులు యాడ్ అయ్యారు. సినిమా చాలా లావిష్ గా తీశాం. చాలా మంచి సీక్వెన్స్ లు వున్నాయి. ఎఫ్ 2కి మించిన ఫన్ ఎఫ్ 3 లో వుంది.

నెట్ ఫ్లిక్ష్ లో చేస్తున్న వెబ్ సిరిస్ గురించి?

ఆ సిరిస్ చాలా వండర్ ఫుల్ గా వుంటుంది. దాని గురించి ఇప్పుడే ఎక్కువగా చెప్పకూడదు. ఐతే కెరీర్ లో మొదటిసారి చాలా భిన్నమైన పాత్రలో కనిపిస్తా.

ఇది మీకు ఏడో మల్టీ స్టారర్.. మీరు మళ్ళీ మళ్ళీ చేయాలనుకునే కాంబినేషన్ ఏది?

కథ బావుంటే ఎవరితోనైనా మల్టీ స్టారర్ చేస్తా.

ప్రతి హీరోకి బాక్సాఫీసు లెక్కలతో కిక్ వుంటుంది.. మీకు లెక్కలకు ప్రాధాన్యత ఇస్తారా?

ప్రతి సినిమా విజయం అవ్వాలానే కోరుకుంటా. బాక్సాఫీసు లెక్కలు సంగతి అటుంచితే నిర్మాతకు మేలు జరగాలని భావిస్తా. నిర్మాతకు అన్ని విధాల సహకరిస్తా. తర్వాత అంతా ప్రేక్షకుల చేతిలో వుంటుంది.

మీ సినిమా బడ్జెట్, ఫిలిం మేకింగ్ ప్లానింగ్ లో ఇన్వాల్ అవుతారా?

నేను నిర్మాత పక్షాన ఆలోచిస్తా. సెట్ కి వెళ్ళిన తర్వాత ఏది వృధా జరుగుతున్నా ఒప్పుకోను. ఇక ఫిలిం మేకింగ్ ప్లానింగ్ కి ఒక ఫార్ములా అనేది వుండదు. అంతిమంగా రిజల్ట్ బావుంటే.. మనం పడిన కష్టం అంతా మర్చిపోతాం.

ఏదైనా రియాలిటీ షోకి హోస్ట్ చేయాలనీ ఉందా?

ఇది వరకే చాలా మంది నన్ను సంప్రదించారు. ఐతే రియాలిటీ షో చేయడంలో నాకు చిన్న ఇబ్బంది వుంది. చెప్పిన డైలాగ్ మళ్ళీ చెప్పి ఇచ్చిన ఎక్స్ ప్రెషన్స్ ఇవ్వమంటే రెండు మూడుసార్లు తర్వాత నాకు ఎదో తెలియని బ్లాక్ వచ్చేస్తుంది.

మీ అబ్బాయిని ఎప్పుడు లాంచ్ చేస్తున్నారు?

చదువుకుంటున్నాడు. ప్రస్తుతానికి ఎలాంటి ఆలోచనలు లేవు.

సినిమా చేసినప్పుడే కనిపిస్తారు. మిగతా సమయంలో ఎక్కడా కనిపించరు .. కారణం?

ఎవరితో కలవకూడదని కాదు. సినిమా తప్ప బయటికి వచ్చి మాట్లాడానికి మరో టాపిక్ వుండదు కదా. ఫ్యామిలీతో గడపటానికి ఎక్కువ ప్రాధాన్యత ఇస్తా. మెడిటేషన్, ధ్యానం చేస్తుంటాను.

మీ నాన్నగారి బయోపిక్ లో నటిస్తారా?

చేస్తే బాగానే వుంటుంది. ఐతే స్క్రిప్ట్ కుదరాలి కదా.. వివేకానంద కథ అనుకున్నాను. అది కుదరలేదు.

రియల్ లైఫ్ లో ఫస్ట్రేషన్ ఉంటుందా?

వుండదు. కానీ నేను టైం ని బాగా ఫాలో అవుతాను. ఈ విషయంలో ఎవరైనా ఇబ్బంది పెడితే కొంచెం చిరాకు వస్తుంది (నవ్వుతూ).

సినిమా ఇండస్ట్రీలో పోటీ, పోలికలు కామన్.,.కానీ ఈ రెండిటికీ దూరం అని చెబుతున్నారు.. ఎలా సాధ్యం?

నేను ఒకరితో పోల్చుకొను. నాకు ఉన్నదే బోనస్ అనుకుంటా. ఇంకేది ఎక్కువగా అడగను. ఆనందంగా ఉండటానికి ప్రయత్నిస్తా. సినిమాల్లోనే కాదు ప్రతి ఒక్కరికి ఇది చాలా అవసరం. ఈ సృష్టిలో ప్రతి ఒక్కరు ప్రత్యేకం. ఒకరితో ఒకరు పోల్చుకోకూడదు. 

అందరూ ఒక వైపు.. ఆ ఒక్కడూ మరో వైపు

రాజకీయ జూదంలో ఓడితే బతుకేంటి?