ఘనంగా జరిగిన హీరోయిన్ పెళ్లి వేడుక

హీరోయిన్ మీరా చోప్రా వైవాహిక బంధంలోకి ఎంటరైంది. ప్రియుడు రక్షిత్ కేజ్రీవాల్ ను ఈరోజు ఆమె వివాహం చేసుకుంది. జైపూర్ లోని బ్యూనా విస్తా లగ్జరీ గార్డెన్ స్పా రిసాప్ట్ లో ఈమె పెళ్లి 2 రోజుల పాటు అంగరంగ వైభవంగా జరిగింది.

పెళ్లి వేడుక ముగిసిన వెంటనే ఆ ఫొటోల్ని సోషల్ మీడియాలో షేర్ చేసింది మీరా చోప్రా. "ఆనందాలు, గిల్లికజ్జాలు, త్యాగాలు, నవ్వులు, కన్నీళ్లు.. ఇకపై అన్నీ నీతోనే. ప్రతి జన్మకు నువ్వే కావాలి" అంటూ పోస్ట్ పెట్టింది. పెళ్లి వేడుకలో ఎరుపు రంగు డిజైనరీ దుస్తుల్లో మెరిసింది మీరా.

2 రోజుల పాటు మీరా చోప్రా, రక్షిత్ పెళ్లి వేడుక జరిగింది. నిన్న మెహందీ ఫంక్షన్ తో సంబరం ప్రారంభమైంది. నిన్న రాత్రి సంగీత్, కాక్ టైల్ పార్టీ జరగ్గా.. ఈరోజు సాయంత్రం 4 గంటలకు పెళ్లి జరిగింది. రాత్రికి రిసెప్షన్ ఏర్పాటు చేశారు. ఈ పెళ్లి కోసం రిసార్ట్ మొత్తాన్ని బుక్ చేసింది ఈ జంట.

తెలుగులో బంగారం, వాన లాంటి సినిమాల్లో నటించింది మీరా చోప్రా. మూడేళ్లుగా ఆమెకు అవకాశాలు తగ్గిపోయాయి. ప్రస్తుతం 2 హిందీ సినిమాలున్నప్పటికీ అవి చిన్న చిత్రాలే. మరోవైపు ఓటీటీలో రాణిస్తోంది. ఇప్పుడు పెళ్లితో వైవాహిక బంధంలోకి ప్రవేశించింది 40 ఏళ్ల మీరా చోప్రా.