మలయాళీ సూపర్ స్టార్ కు అస్వస్థత

నటుడు మోహన్ లాల్ అస్వస్థతకు గురయ్యారు. ఆయన్ను వెంటనే కొచ్చిలోని ఓ ప్రైవేట్ హాస్పిటల్ లో జాయిన్ చేశారు. పూర్తి స్థాయిలో పరీక్షలు నిర్వహించిన వైద్యులు, ఆయన వైరల్ ఫీవర్ తో బాధపడుతున్నట్టు తేల్చారు.

కొన్ని రోజులుగా వర్క్ పరంగా బిజీగా ఉన్నారు మోహన్ లాల్. దీనికి కారణం బారోజ్ సినిమా. ఈ సినిమాలో ఆయన నటించడమే కాదు, స్వయంగా దర్శకత్వం కూడా వహిస్తున్నారు. అందుకే ఆయన ఎక్కువ ఒత్తిడికి లోనయ్యారు.

ఈ కారణంగానే ఆయన అస్వస్థతకు గురయ్యారు. కొద్దిసేపటికిందట ఆయన డిశ్చార్జ్ అయి ఇంటికెళ్లారు. 5 రోజుల పాటు రెస్ట్ తీసుకుంటే సరిపోతుందని వైద్యులు సూచించారు. ఆయన దర్శకత్వం వహిస్తున్న బారోజ్ సినిమా ఇప్పటికే పలుమార్లు వాయిదా పడింది.

మోహన్ లాల్ అస్వస్థత కారణంగా సినిమా మరోసారి వాయిదా పడుతుందనే పుకార్లను ఆయన టీమ్ ఖండించింది. అక్టోబర్ 3న ఈ సినిమా రిలీజ్ అవుతుందని నిన్ననే ప్రకటించారు.

ఇండియా గర్వించదగ్గ నటుల్లో ఒకరు మోహన్ లాల్. తెలుగులో కూడా ఆయనకు మంచి ఫాలోయింగ్ ఉంది. ఇప్పటికే 4సార్లు జాతీయ అవార్డు అందుకున్న ఈ నటుడు, తన దర్శకత్వంలో తెరకెక్కుతున్న సినిమాతో మరోసారి నేషనల్ అవార్డ్ పై కన్నేశారు