ఈ సినిమా కూడా చేతులు మారింది

నాని-సుజీత్ సినిమా చేతులు మారిందనే విషయాన్ని చెప్పుకున్నాం. అదే విధంగా హనుమాన్ ఫ్రాంచైజీ కూడా చేతులు మారబోతోందనే విషయాన్ని గతంలోనే చెప్పుకున్నాం. ఇప్పుడు దీనికి సంబంధించి అధికారిక ప్రకటన వచ్చింది.

‘హనుమాన్’కు సీక్వెల్ గా రాబోతున్న ‘జై హనుమాన్’ ప్రాజెక్టును మైత్రీ మూవీ మేకర్స్ అధికారికంగా ప్రకటించింది. దీపావళికి ఫస్ట్ లుక్ రిలీజ్ చేయబోతున్నట్టు తెలిపింది. ప్రశాంత్ వర్మ సినిమాటిక్ యూనివర్స్ నుంచి మరో ఎపిక్ రాబోతోందని అంటోంది.

‘హనుమాన్’ సినిమా ఫ్రాంచైజీ నిరంజన్ రెడ్డిది. ప్రైమ్ షో ఎంటర్ టైన్ మెంట్స్ బ్యానర్ పై హనుమాన్ చిత్రాన్ని నిర్మించి సంక్రాంతి బరిలో బ్లాక్ బస్టర్ కొట్టిన నిరంజన్ రెడ్డి, ఆ సినిమాకు సీక్వెల్ గా రాబోతున్న ‘జై హనుమాన్’ను కూడా లెక్కప్రకారం నిర్మించాలి.

కానీ ఇప్పుడీ సీక్వెల్ ను మైత్రీ మూవీ మేకర్స్ టేకోవర్ చేసింది. ఈ మేరకు ప్రీ-లుక్ పోస్టర్ కూడా రిలీజ్ చేసింది. ‘జై హనుమాన్’లో టైటిల్ పాత్రను ‘కాంతార’ ఫేమ్ రిషబ్ షెట్టి పోషించే అవకాశం ఉంది. బహుశా ఇదే విషయాన్ని గురువారం ప్రకటించే ఛాన్స్ ఉంది.

‘జై హనుమాన్’ మూవీకి సంబంధించి స్క్రిప్ట్ వర్క్ పూర్తయిందని, ప్రీ-ప్రొడక్షన్ వర్క్ మొదలుపెట్టినట్టు దర్శకుడు ఇదివరకే ప్రకటించాడు.