చందు అలా.. చైతూ ఇలా.. ఏంటిలా!

క్రిస్మస్ కు రావాల్సిన సినిమా.. ఎటు వెళ్లిపోయిందో ఎవ్వరూ చెప్పలేకపోతున్నారు.. సంక్రాంతికి వచ్చేలా లేదు.. పోనీ జనవరి 26 అనుకుంటే అది కూడా అనుమానమే.. అసలు తండేల్ సినిమా ఎంత వరకు వచ్చింది.. ఆ సినిమా అప్ డేట్ ఏంటి.. రిలీజ్ ఎప్పుడు..?

ఈ సినిమాకు సంబంధించి హీరో, దర్శకుడు ఇద్దరూ ఈరోజు 2 సినిమా ఫంక్షన్లలో మెరిశారు. ఒకరు తండేల్ సినిమా విడుదలపై అయోమయంగా స్పందిస్తే, మరొకరు అస్సలు ఆ టాపిక్ టచ్ చేయకుండా వెళ్లిపోయారు.

ముందుగా చందు మొండేటి విషయానికొద్దాం.. మరో 10 రోజులు షూట్ చేస్తే టోటల్ సినిమా షూటింగ్ పూర్తయిపోతుందని ప్రకటించాడు చందు. అయితే అదే టైమ్ లో సినిమా ఎప్పుడు రిలీజ్ అవుతుందనే విషయం మాత్రం చెప్పలేకపోయాడు.

సంక్రాంతికి తాము సిద్ధంగా ఉంటామని.. కానీ చరణ్ సినిమా గేమ్ ఛేంజర్ ఉందని అల్లు అరవింద్, వెంకటేష్ సినిమా వస్తోందని నాగచైతన్య ఆలోచనలో పడ్డారని అన్నాడు. పోనీ.. జనవరి 26న రిలీజ్ చేద్దామంటే ఆరోజు ఆదివారం పడిందంటున్నాడు. క్రిస్మస్ కు మాత్రం సినిమా రెడీ అవ్వదని చెప్పేశాడు. మొత్తానికి విడుదలపై క్లారిటీ ఇవ్వకుండానే వెళ్లిపోయాడు.

ఇక హీరో నాగచైతన్య కూడా ముందుకొచ్చాడు. కిరణ్ అబ్బవరం నటించిన ‘క’ సినిమా ప్రీ-రిలీజ్ ఫంక్షన్ కు ముఖ్య అతిథిగా హాజరైన నాగచైతన్య.. తన సినిమా గురించి ఒక్క ముక్క కూడా మాట్లాడకుండానే ప్రసంగం ముగించాడు. తండేల్ రిలీజ్ పై నిర్మాత అల్లు అరవింద్ నిర్ణయం తీసుకుంటారని, ఆయనపై తనకు పూర్తి విశ్వాసం ఉందని మాత్రం అనేశాడు.

ఇలా ఇటు దర్శకుడు, అటు హీరో.. ఒకేసారి మీడియా ముందుకొచ్చినప్పటికీ తండేల్ గురించి ఎలాంటి అప్ డేట్స్ ఇవ్వకుండానే తప్పించుకున్నారు. అయితే ఒక విషయంపై మాత్రం స్పష్టత వచ్చింది. ఈ సినిమా క్రిస్మస్ కు రాదు. అల్లు అరవింద్ కాస్త గట్టి నిర్ణయం తీసుకుంటే మాత్రం సంక్రాంతికి వచ్చేస్తుంది. అది కూడా మిస్సయితే సమ్మర్ కే.