ఇప్పటికే లేట్.. మళ్లీ కౌంట్ డౌన్ ఒకటి!

సినిమాకు కొబ్బరికాయ కొట్టడంతోనే ప్రచారం ప్రారంభిస్తున్న రోజులివి. పోస్ట్ ప్రొడక్షన్ దశలోకి అడుగుపెట్టడంతోనే గట్టిగా ప్రమోషన్ చేస్తున్నారు మేకర్స్. ఇక పాన్ ఇండియా రేంజ్ సినిమాలకైతే కనీసం 2 నెలల ముందు నుంచే ప్రచారం మొదలైపోతోంది.

రోజులు ఇలా ఉంటుంటే, నిఖిల్ మాత్రం తన సినిమా ప్రచారాన్ని విడుదలకు సరిగ్గా 5 రోజుల ముందు మొదలుపెడుతున్నాడు. ఇప్పటికే ఆలస్యం అనుకుంటే, దానికి మళ్లీ కౌంట్ డౌన్ కూడా ప్రకటించాడు.

నిఖిల్ తాజా చిత్రం “అప్పుడో ఇప్పుడో ఎప్పుడో”. చాన్నాళ్ల కిందటే రెడీ అయిన ఈ సినిమాకు ఉన్నఫలంగా విడుదల తేదీ ప్రకటించారు. ఆ వెంటనే లిరికల్ వీడియోస్ విడుదల చేయడం, టీజర్ లాంఛ్ చేయడం లాంటివి చేశారు. ఇంత తక్కువ టైమ్ ఉన్నప్పుడు మరింత ఎగ్రెసివ్ గా ప్రచారం చేయాలి.

కానీ నిఖిల్ మాత్రం తాపీగా ఓ ఇంటర్వ్యూ చేశాడు. ఒక ఫ్రెండ్ చందు మొండేటిని ఒకవైపు, మరోవైపు ఇంకో ఫ్రెండ్, ఈ సినిమా దర్శకుడు సుధీర్ వర్మను కూర్చోబెట్టుకొని చిట్ చాట్ చేశాడు. ఆ ఇంటర్వ్యూను ఇవాళ‌ రిలీజ్ చేస్తామంటూ కౌంట్ డౌన్ ప్రకటించాడు.

చిన్న సినిమాలకు కూడా వినూత్నంగా ప్రచారం చేస్తున్న ఈ రోజుల్లో, విడుదలకు వారం ముందు కూడా ప్రచారం ప్రారంభించకపోవడం ఏంటంటూ సోషల్ మీడియాలో కామెంట్స్ వినిపిస్తున్నాయి. నిఖిల్ ఈ సినిమాను లైట్ తీసుకున్నట్టు కొన్ని రోజులుగా ప్రచారం జరుగుతోంది. కనీసం అతడు ఓ ఇంటర్వ్యూ అయినా ఇచ్చాడంటూ సంతోషం వ్యక్తం చేస్తున్నారు మరికొంతమంది.

రుక్మిణి వసంత్, దివ్యాంశ హీరోయిన్లుగా నటించిన ఈ సినిమాకు సింగర్ కార్తీక్ పాటలు కంపోజ్ చేయగా.. సన్నీ బ్యాక్ గ్రౌండ్ స్కోర్ అందించాడు. 8వ తేదీన రిలీజ్ అవుతోంది ఈ మూవీ.