పూజా హెగ్డే కోసం మరో ‘జిగేల్ రాణి’ రెడీ

అప్పుడెప్పుడో నాలుగేళ్ల కిందటొచ్చిన రంగస్థలం సినిమాలో ఐటెంసాంగ్ చేసింది పూజాహెగ్డే. ఆ తర్వాత మళ్లీ ఆమెకు ఐటెంసాంగ్ చేయాల్సిన అవసరం రాలేదు. టాలీవుడ్ లో టాప్ హీరోయిన్ అయిపోయింది. వరుసపెట్టి హిట్స్ కొట్టింది. మళ్లీ ఇన్నాళ్లకు ఆమెకు స్పెషల్ సాంగ్ పై మనసు మళ్లినట్టుంది.

ఎఫ్3 సినిమాలో ఐటెంసాంగ్ కోసం పూజాహెగ్డేను తీసుకున్న సంగతి తెలిసిందే. ఈరోజు ఆ సాంగ్ షూటింగ్ మొదలైంది. రెడ్ డ్రెస్ లో పూజా హెగ్డే వెనక నుంచి దిగిన ఫోటోను మేకర్స్ రిలీజ్ చేశారు. కాకపోతే పూజా హెగ్డే అనే విషయాన్ని మాత్రం వాళ్లు చెప్పలేదు. చెప్పాల్సిన అవసరం కూడా లేదు.

ప్రస్తుతం తెలుగు-హిందీ భాషల్లో వరుస సినిమాలతో బిజీగా ఉంది పూజా హెగ్డే. ఇలాంటి టైమ్ లో ఆమె ఓ ఐటెంసాంగ్ కు ఓకే చెప్పడం పెద్ద విషయమే. కాకపోతే రెమ్యూనరేషన్ కూడా పెద్దగానే ముట్టడంతో ఆమె ఈజీగా ఒప్పేసుకుంది. పూజా రాకతో ఈ ఐటెంసాంగ్ రేంజ్ పెరిగింది. గతంలో జిగేలు రాణి సాంగ్ కంపోజ్ చేసిన దేవిశ్రీప్రసాదే, ఎఫ్3 ఐటెంసాంగ్ కూడా కంపోజ్ చేశాడు.

ఇక ఎఫ్3 విషయానికొస్తే, ఇందులో ఆల్రెడీ చాలామంది హీరోయిన్లు ఉన్నారు. అందరికీ తెలిసిన తమన్న, మెహ్రీన్ తో పాటు ఓ కీలక పాత్ర కోసం సోనాల్ చౌహాన్ ను తీసుకున్నారు. ఇప్పుడు పూజా హెగ్డే రాకతో.. ఎఫ్3లో హీరోయిన్ల సంఖ్య 4కు చేరినట్టయింది.

ఈ సాంగ్ షూటింగ్ తో ప్యాచ్ వర్క్ మినహా ఎఫ్3 షూటింగ్ మొత్తం పూర్తవుతుంది. అనీల్ రావిపూడి దర్శకత్వంలో తెరకెక్కుతున్న ఈ సినిమాను మే 27న విడుదల చేయబోతున్నారు.