ప్రభాస్ ఫ్యాన్స్ కు ఆ ఆనందమైనా దక్కుతుందా?

రాధేశ్యామ్ ఫ్లాప్ తో ప్రభాస్ ఫ్యాన్స్ చాలా నిరాశ చెందారు. అతడి నుంచి మరో సినిమా వచ్చేంత వరకు ఎదురుచూస్తున్నారు. అయితే రాధేశ్యామ్ థియేటర్లలో ఫ్లాప్ అయినా, ఓటీటీలో హిట్ అయితే సంబరపడాలనుకున్నారు. కానీ వాళ్లకు ఆ అవకాశం కూడా దక్కలేదు. అమెజాన్ లో వచ్చిన రాధేశ్యామ్ కు నార్త్ బెల్ట్ లో తప్పితే, పెద్దగా రెస్పాన్స్ రాలేదు.

అలా రాధేశ్యామ్ గాయాలను అనుభవిస్తున్న ప్రభాస్ ఫ్యాన్స్ కు ఇప్పుడు మరో చిన్న అవకాశం వచ్చింది. త్వరలోనే ఈ సినిమా టీవీల్లోకి రాబోతోంది. కనీసం టీఆర్పీల్లోనైనా ఈ సినిమా రికార్డులు సృష్టిస్తే, ట్రెండింగ్ చేసి పండగ చేసుకోవాలనుకుంటున్నారు ఫ్యాన్స్. మరి అభిమానులకు రాధేశ్యామ్ ఆ చిట్టచివరి ఆనందాన్నయినా అందిస్తుందా?

రాధేశ్యామ్ శాటిలైట్ రైట్స్ ను జీ తెలుగు ఛానెల్ దక్కించుకుంది. ఈ నెలలోనే సినిమాను ప్రసారం చేయబోతోంది. ఈ సినిమాకు రికార్డ్ స్థాయి రేటింగ్ రావాలని ప్రభాస్ ఫ్యాన్స్ కోరుకుంటున్నారు.

ప్రస్తుతం టీఆర్పీల పరంగా అల వైకుంఠపురములో సినిమాదే నంబర్ వన్ స్థానం. ఆ తర్వాత స్థానంలో సరిలేరు నీకెవ్వరు నిలిచింది. ఈ రెండు సినిమాలను క్రాస్ చేయకపోయినా, కనీసం ఈ సినిమాల స్థాయిలో టీఆర్పీ వస్తే చాలని ప్రభాస్ ఫ్యాన్స్ కోరుకుంటున్నారు.

రాధాకృష్ణకుమార్ దర్శకత్వంలో తెరకెక్కింది రాధేశ్యామ్ సినిమా. ప్రభాస్-పూజాహెగ్డే హీరోహీరోయిన్లుగా నటించిన ఈ సినిమా ఇండియాలోని బిగ్గెస్ట్ డిజాస్టర్లలో ఒకటిగా నిలిచింది. రాధాకృష్ణ, తమన్ కలిసి ఈ సినిమాను లేపడానికి ఎంతగానో కృషిచేశారు. కానీ వాళ్ల ప్రయత్నం ఫలించలేదు.