బ్రాండ్లకు దూరంగా ప్రభాస్!

మహేష్ బాబు, ఎన్టీఆర్, అల్లు అర్జున్ లాంటి సమకాలీన సూపర్‌స్టార్లతో పోలిస్తే, ప్రభాస్ మాత్రం బ్రాండ్ ఎండోర్స్‌మెంట్లకు దూరంగా ఉంటూ వస్తున్నారు. ఇటీవల కాలంలో ఎన్నో ప్రముఖ బ్రాండ్ల నుండి వచ్చిన ఆఫర్లను ఆయన తిరస్కరించారు. ఒక ప్రముఖ కోలా కంపెనీతో పాటు పలు ఆటోమొబైల్ బ్రాండ్లు ప్రభాస్‌ను సంప్రదించగా, ఆయన ఆసక్తి చూపలేదట.

“ఒక ఫోటోషూట్‌కి ఒక్క రోజు, యాడ్ షూట్‌కి మరో రోజు, ప్రమోషన్‌కి ఇంకో రోజు—మొత్తం మూడు రోజుల్లోనే రూ. 25 కోట్ల వరకు సంపాదించగలిగే అవకాశం ఉండినా, ప్రభాస్ మాత్రం బ్రాండ్ ఎండోర్స్‌మెంట్లకు దూరంగా ఉండే నిర్ణయం తీసుకున్నారు,” అంటూ ఓ సెలబ్రిటీ మేనేజర్ వెల్లడించారు.

మహేష్, బన్నీ, ఎన్టీఆర్, రామ్ చరణ్ వంటి స్టార్‌లు ఇప్పటికే పలు బ్రాండ్లతో ఒప్పందాలు చేసుకున్నప్పటికీ, హీరో ప్రభాస్ మాత్రం తన సంపూర్ణ దృష్టిని నటనపై పెట్టారు. “తన సినిమాలపైనే పూర్తి సమయాన్ని కేటాయించాలని కోరుకునే ప్రభాస్, భారీ మొత్తాలు ఆఫర్ చేస్తున్నా బ్రాండ్లను మర్యాదపూర్వకంగా తిరస్కరిస్తూ వస్తున్నారు,” అని ఆ మేనేజర్ పేర్కొన్నారు.

బాహుబలి తర్వాత సాహో, సలార్, కాల్కి 2898 AD వంటి పాన్-ఇండియా ప్రాజెక్టులతో ప్రభాస్‌కు గ్లోబల్ లెవెల్‌లో క్రేజ్ పెరిగింది. అయినా ఆయన నటనపై దృష్టి పెట్టడానికే ఆసక్తి చూపుతున్నారని, ప్రస్తుతం నాలుగు సినిమాలు చేస్తూ ఒక్కో సినిమాకు రూ. 125 కోట్లకు పైగా పారితోషికం తీసుకుంటూ కూడా బ్రాండ్ల దూరంగా ఉండటం ఆయన ప్రత్యేకతను చూపుతోందని పరిశ్రమ వర్గాలు చెబుతున్నాయి.