డిజాస్టర్ సినిమాకు సీక్వెల్ వస్తోంది

సూపర్ హిట్టయిన సినిమాలకు మాత్రమే సీక్వెల్స్ వస్తాయి. ఫ్లాప్ అయిన సినిమాలకు సీక్వెల్స్ రావు. ఒకవేళ విడుదలకు ముందు సీక్వెల్ ప్రకటించినప్పటికీ, డిజాస్టర్ రిజల్ట్ వచ్చిన తర్వాత సీక్వెల్ ఆలోచనల నుంచి తప్పుకుంటారు. అయితే భారతీయుడు-3 పరిస్థితి వేరు.

భారతీయుడు-2 పెద్ద ఫ్లాప్ అయినా భారతీయుడు-3 తీయడానికి రెడీ అవుతున్నారు. తాజాగా ప్రీ ప్రొడక్షన్ పనులు కూడా ప్రారంభించారు. దీనికి కారణం పార్ట్-3 షూటింగ్ చాలా భాగం పూర్తవ్వడమే.

పార్ట్-2తో పాటే, పార్ట్-3 షూటింగ్ కూడా పూర్తి చేశారు. గతంలో మేకర్స్ ఇచ్చిన సమాచారం ప్రచారం భారతీయుడు-3 షూటింగ్ దాదాపు 70 శాతం పూర్తయింది. సో.. మిగతా 30 శాతం షూట్ పూర్తిచేస్తే, సినిమా సిద్ధమైనట్టే.

అయితే ఈ 30 శాతం పూర్తిచేయడానికి కూడా కండిషన్స్ పెట్టింది నిర్మాణ సంస్థ లైకా. ఇప్పటికే పీకల్లోతు నష్టాల్లో కూరుకుపోయిన ఈ సంస్థపై ఒక దశలో దివాళా తీసిందనే పుకార్లు కూడా వచ్చాయి.

మొత్తానికి పార్ట్-3ని వీలైనంత తక్కువ బడ్జెట్ లో పూర్తిచేసి విడుదల చేయాలని నిర్ణయించారు. శంకర్ ప్రతిపాదించిన ఓ ఖరీదైన పాటను కూడా పక్కనపెట్టినట్టు తెలుస్తోంది. కమల్ హాసన్ ఈ సినిమాకు నెల రోజులు కాల్షీట్లు కేటాయించాల్సి ఉంది. ఆ స్పష్టత వచ్చిన తర్వాత సినిమా ప్రకటన చేస్తారు.