ప్రియదర్శి హుక్ స్టెప్ వెనుక అతను…

కమెడియన్లు హీరోలుగా మారిన సినిమాల్లో పాటలకు పెద్ద స్కోప్ ఉండదు. ఒకవేళ వున్నా సరే ఏదో వున్నాయంటే వున్నాయన్నట్టు చుట్టేస్తారు. కానీ, దర్శకుడు మోహనకృష్ణ ఇంద్రగంటి, శ్రీదేవి మూవీస్ అధినేత శివలెంక కృష్ణ ప్రసాద్ భారీ స్థాయిలో తెరకెక్కిస్తున్నారు. ప్రియదర్శి హీరోగా వాళ్లిద్దరి కలయికలో తెరకెక్కుతున్న సినిమా ‘సారంగపాణి జాతకం’.

‘సారంగపాణి జాతకం’లో ‘సారంగో సారంగో… ‘ సాంగ్ రీసెంట్‌గా రిలీజ్ అయ్యింది. ఆ పాటను అర్మాన్ మాలిక్ చేత పాడించారు. కొరియోగ్రఫీ కోలీవుడ్ మాస్టర్ దినేష్ చేత చేయించారు. ‘వేట్టయాన్’లో మంజూ వారియర్ వైరల్ సాంగ్ ‘మనసిలాయో’ చేసింది ఆయనే. విజయ్ ‘లియో’, ‘మాస్టర్’ సినిమాల్లోనూ సాంగ్స్ చేశారు.

ప్రియదర్శి చేత ‘సారంగో సారంగో’ పాటలో స్టెప్స్ వేయించారు దినేష్ మాస్టర్. స్టార్ హీరోస్ వేసినట్టు హుక్ స్టెప్ ఒకటి వేయించారు. హీరోగా ఇంతకు ముందు కొన్ని సినిమాల్లో ప్రియదర్శి సాంగ్స్ చేశారు. కానీ, హుక్ స్టెప్ వేస్తూ కాస్త భారీతనంతో కూడిన సాంగ్ చేయడం మాత్రం ‘సారంగపాణి జాతకం’తో మొదలు అని చెప్పాలి.

‘సారంగో సారంగో…’ సాంగ్ కోసం గచ్చిబౌలి ఫైనాన్షియల్ డిస్ట్రిక్‌లో రెండు గంటల పాట ట్రాఫిక్ ఆపేసి, రోడ్డు మీద పాతిక మందికి పైగా డ్యాన్సర్లతో సాంగ్ చేశారు. ఆ సాంగ్ మంచి రెస్పాన్స్ అందుకుంటోంది. వివేక్ సాగర్ మూవీకి మ్యూజిక్ అందిస్తున్నారు. త్వరలో టీజర్ రిలీజ్ చేసేందుకు యూనిట్ సన్నాహాలు చేస్తోంది.

క్రిస్మస్ సీజన్ టార్గెట్ చేస్తూ డిసెంబర్ 20న ‘సారంగపాణి జాతకం’ థియేటర్లలోకి రానుంది. కంప్లీట్ ఫన్ ఎంటర్‌టైనర్‌గా తెరకెక్కిన ఈ సినిమాలో తెలుగమ్మాయి రూపా కొడవాయుర్ హీరోయిన్.