జాతీయ స్థాయిలో రష్మికకు మరో గుర్తింపు

ఇప్పటికే నేషనల్ క్రష్ అనిపించుకున్న రష్మిక, ఇప్పుడు మరోసారి జాతీయ స్థాయిలో గుర్తింపు తెచ్చుకుంది. ఈవారం IMDb పాపులర్ ఇండియన్ సెలబ్రిటీస్ ఫీచర్ లిస్ట్‌లో రష్మిక స్థానం దక్కించుకుంది. ఏకంగా ఆమెకు జాతీయ స్థాయిలో మూడో స్థానం దక్కడం విశేషం.

తాజాగా ఆమె తన పుట్టినరోజును సెలబ్రేట్ చేసుకుంది. ఆ తర్వాత పుష్ప2 నుంచి ఓ వీడియో రిలీజైంది. ఈ రెండు అంశాలతో ఆమె జాతీయ స్థాయిలో పాపులర్ అయింది. నిజానికి పుష్ప-2 వీడియోలో రష్మిక లేనప్పటికీ, ఆ ప్రాజెక్టులో ఆమె హీరోయిన్ గా నటిస్తోంది కాబట్టి, ఆమె హ్యాష్ ట్యాగ్ పాపులర్ అయింది.

ఈ పాపులారిటీ ఆధారంగా ఇండియన్ సెలబ్రిటీస్ ఫీచర్ లిస్ట్ లో రష్మిక మూడో స్థానానికి ఎగబాకినట్టు IMDb ప్రకటించింది. దీంతో ఆమె ఫ్యాన్స్ సోషల్ మీడియాలో మరోసారి పండగ చేసుకుంటున్నారు. లిస్ట్ లో నాని, కీర్తిసురేష్ కు వరుసగా 49, 50 స్థానాలు దక్కాయి. 

వరుసపెట్టి బాలీవుడ్ సినిమాలు చేస్తున్న ఈ బ్యూటీ, ఇప్పుడు మరోసారి సౌత్ వైపు వచ్చింది. హిందీలో యానిమల్ మూవీ చేస్తూనే, పుష్ప-2లో నటిస్తోంది. మరోవైపు నితిన్-వెంకీ కుడుముల సినిమాకు కాల్షీట్లు కేటాయించింది. దీంతో పాటు తెలుగు-తమిళ భాషల్లో ఫిమేల్ ఓరియంటెడ్ కాన్సెప్ట్ తో రాబోతున్న రెయిన్ బో అనే సినిమాను కూడా లాంఛ్ చేసింది.