Epaper
పెళ్లి చేసుకున్న తర్వాత కూడా కాజల్ హవా తగ్గలేదు. ఆమె వరుసపెట్టి సినిమాలు చేసింది. ఎందుకంటే, పెద్ద హీరోలకు ఆమె తప్ప మరో ఆప్షన్ లేదు. చిరంజీవితో ఆచార్య, నాగార్జునతో ది ఘోస్ట్ సినిమాలకు కమిట్ అయింది. అయితే ఎప్పుడైతే గర్భవతి అయిందో, అప్పుడిక అన్నీ ఆపేసింది. నాగార్జున సినిమాను వదులుకున్నది కూడా అందుకే. ఇలా కాజల్ తగ్గడంతో, ఆ స్థానాన్ని శృతిహాసన్ భర్తీ చేస్తోంది.
ప్రస్తుతం టాలీవుడ్ లో సీనియర్లకు బెస్ట్ ఆప్షన్ గా మారుతోంది శృతిహాసన్. ఇప్పటికే పవన్ కల్యాణ్ సరసన నటించిన ఈ బ్యూటీ, ఈమధ్య బాలకృష్ణ సినిమాలో కూడా నటించేందుకు అంగీకరించింది. ఇప్పుడు చిరంజీవి సినిమాలో హీరోయిన్ గా ఎంపికైంది. సో.. ఇకపై నాగార్జున, వెంకటేష్ కూడా తమ సినిమాల కోసం శృతిహాసన్ ను సంప్రదించొచ్చన్నమాట.
ఒకప్పుడు సీనియర్ హీరోలకు నయనతార, అనుష్క లాంటి ఒకరిద్దరు మాత్రమే దిక్కు. వీళ్లలో అనుష్క సినిమాలు పూర్తిగా తగ్గించేసింది. నయనతార తన రేటును 5 కోట్లు పెంచేసింది. దీంతో కాజల్ కు డిమాండ్ పెరిగింది. కాజల్ తో పాటు మరో ఇద్దరు ముగ్గురు ప్రత్యామ్నాయంగా ఉన్నప్పటికీ ఆమెకే క్రేజ్ వచ్చింది.
ఇప్పుడు కాజల్ కూడా తప్పుకోవడంతో శృతిహాసన్ తెరపైకి వచ్చింది. గోపీచంద్ మలినేని దర్శకత్వంలో బాలయ్య హీరోగా నటిస్తున్న సినిమా కోసం శృతిని తీసుకున్నారు. ఇప్పుడు మైత్రీ మూవీ మేకర్స్ బ్యానర్ పై బాబి దర్శకత్వంలో చిరంజీవి హీరోగా రాబోతున్న సినిమా కోసం కూడా ఈమెనే తీసుకున్నారు. ఈ ఇద్దరు దర్శకులకు శృతిహాసన్ సెంటిమెంట్ ఉంది.