ఈ సినిమా కూడా తమన్ ఖాతాలోకే చేరిందిగా..!

సుజీత్ దర్శకత్వంలో పవన్ కల్యాణ్ ఓ సినిమా చేయబోతున్నాడనే సంగతి తెలిసిందే. ఈరోజు ఈ సినిమా లాంఛనంగా మొదలైంది. అల్లు అరవింద్, దిల్ రాజు, సురేష్ బాబుతో పాటు చాలామంది ప్రముఖులు ఈ సినిమా ఓపెనింగ్ కు వచ్చారు. డీవీవీ దానయ్య నిర్మాత.

ఈ సినిమాకు OG అనే టైటిల్ ఫిక్స్ చేశారు. అయితే ఇది వర్కింగ్ టైటిల్ మాత్రమే. ఇదిలా ఉండగా.. గ్యాంగ్ స్టర్ కథతో వస్తున్న ఈ సినిమాకు అనిరుధ్ ను సంగీత దర్శకుడిగా తీసుకుంటారనే ప్రచారం జోరుగా సాగింది. కానీ, ఈ సినిమా తమన్ ఖాతాలోకి చేరింది.

అవును.. పవన్-సుజీత్ సినిమాకు తమన్ సంగీతం అందించబోతున్నాడు. ఇంతకుముందు పవన్ నటించిన వకీల్ సాబ్, భీమ్లానాయక్ సినిమాలకు తమనే సంగీతం అందించాడు. ఇప్పుడీ ఓజీ కూడా అతడి ఖాతాలోకే చేరింది.

నిజానికి ఇలాంటి కథలకు అనిరుధ్ అయితే బాగుంటుందనే చర్చ సోషల్ మీడియాలో జోరుగా నడిచింది. విక్రమ్ సినిమాకు అనిరుధ్ ఇచ్చిన బ్యాక్ గ్రౌండ్ స్కోర్ బ్యాక్ బోన్ గా నిలిచింది. అతడితో పాటు సంతోష్ నారాయణన్, దేవిశ్రీ ప్రసాద్ లాంటి పేర్లు కూడా తెరపైకొచ్చాయి.

కానీ అంతా కలిసి మరోసారి తమన్ కే ఓటేశారు. ఈ విషయంలో పవన్ కల్యాణ్, దర్శకుడు సుజీత్ కూడా తమన్ వైపు మొగ్గుచూపినట్టు తెలుస్తోంది. ప్రస్తుతం మంచి ఫామ్ లో ఉన్న తమన్, పాటలతో పాటు బ్యాక్ గ్రౌండ్ స్కోర్ కూడా బాగా ఇస్తున్నాడు.