Epaper
ఈరోజు వరుణ్ తేజ్ కొత్త సినిమా లాంఛ్ అయింది. ప్రవీణ్ సత్తారు దర్శకత్వంలో ఈ హీరో సినిమా చేయబోతున్నాడు. బీవీఎస్ఎన్ ప్రసాద్ నిర్మాతగా రాబోతున్న ఈ సినిమాకు నాగబాబు ప్రజెంటర్.
వరుణ్ తేజ్ కెరీర్ లోనే బిగ్ బడ్జెట్ మూవీగా ఇది రాబోతోంది. యాక్షన్ సినిమాలు తీసే ప్రవీణ్ సత్తారు, వరుణ్ తేజ్ తో ఈ భారీ బడ్జెట్ సినిమాను తీయబోతున్నాడు. నిజానికి ఈ కథను రామ్ తో అనుకున్నాడట ఈ దర్శకుడు. అక్కడ వర్కవుట్ కాకపోవడం, అది నేరుగా వరుణ్ తేజ్ వద్దకు చేరినట్టు తెలుస్తోంది.
ప్రస్తుతం ఈ దర్శకుడు నాగార్జున హీరోగా ది ఘోస్ట్ అనే సినిమా చేస్తున్నాడు. అది ఓ కొలిక్కి వచ్చిన వెంటనే వరుణ్ తేజ్ తో సినిమా సెట్స్ పైకి వెళ్తుంది. ఈ గ్యాప్ లో గని సినిమాను రిలీజ్ చేసి, ఫ్రీ అవుతాడు వరుణ్.
ఈమధ్య స్టోరీ సెలక్షన్ లో కాస్త డిఫరెంట్ గా వెళ్తున్నాడు వరుణ్ తేజ్. గద్దలకొండ గణేశ్, గని సినిమాలు అలా సెలక్ట్ చేసుకున్నవే. ఇక ఎఫ్3లో అతడి పాత్ర పూర్తిగా కామెడీ అనే విషయం తెలిసిందే. ఈ క్రమంలోనే ప్రవీణ్ సత్తారు దర్శకత్వంలో యాక్షన్ ఎంటర్ టైనర్ చేసేందుకు రెడీ అవుతున్నాడు వరుణ్.
ఈ ప్రాజెక్టుకు మిక్కీ జే మేయర్ సంగీతం అందించబోతున్నాడు. హీరోయిన్ ఎవరనేది ఇంకా ఫిక్స్ చేయలేదు.