డొక్కా ఏం మాట్లాడుతున్నారో ఆయనకైనా తెలుసా?

తెలుగుదేశం పార్టీ కార్యాలయం మీద దాడి చేసిన కేసులో పోలీసులు చాలా చురుగ్గా వ్యవహరించినట్టుగా, నాయకుల్ని అరెస్టులు చేసినట్టుగా వారికి క్రెడిట్ కావాలి. అదే సమయంలో ఎస్సీ నాయకుడిని వేధించడానికే అరెస్టు చేశారనే చెడ్డపేరు మాత్రం రాకూడదు.

ఎస్సీ నాయకుడి అరెస్టుకు సంబంధించిన అపకీర్తి మాత్రం జగన్ ఖాతాలోకి వెళ్లాలి. ఇదెలా సాధ్యం చెప్మా.. అనుకుంటున్నారా? వైఎస్సార్ కాంగ్రెస్ పార్టీలో జగన్ ప్రాపకంతో అనేక హోదాలు కూడా అనుభవించి.. ఎన్నికలకు ముందు తెలుగుదేశం తీర్థం పుచ్చుకున్న సీనియర్ నాయకుడు డొక్కా మాణిక్యవరప్రసాద్ మాటల గారడీలో ఏదైనా సాధ్యమే మరి!

తెలుగుదేశం పార్టీకార్యాలయం మీద దాడిచేసిన కేసులో కీలక నిందితులకు హైకోర్టు ముందస్తు బెయిలు నిరాకరించిన తరువాత.. అయిదుగురు ముఖ్యనేతల్లో ముందు జరిగిన అరెస్టు నందిగం సురేష్ దే. మిగిలిన వారిని కూడా అరెస్టు చేయడానికి పోలీసులు ప్రత్యేకబృందాలు పంపారు. అయితే.. నందిగం సురేష్ ఎస్సీ నాయకుడు గనుక.. ఆయన అరెస్టు వలన వైసీపీకి ఎలాంటి సానుభూతి దక్కకుండా చూడాలని ఒక స్కెచ్ వేశారు. ఆ పార్టీలోని సీనియర్ దళిత నాయకుల్లో ఒకడైన డొక్కా మాణిక్యవరప్రసాద్ ప్రస్తుతానికి ఆ బాధ్యత భుజానికెత్తుకున్నారు. నేడోరేపో వర్ల రామయ్య వంటివారు కూడా ఇదే టాపిక్ మీద మీడియాతో మాట్లాడ్డానికి ఎగబడ్తారు.

నందిగం అరెస్టు కావడానికి ప్రధాన కారణం సజ్జల రామక్రిష్ణారెడ్డి అట. ఆయన ఇచ్చిన సమాచారంతోనే పట్టుకున్నారట. నిజానికి ఆయనను అరెస్టు చేయాల్సిన అవసరం కూడా లేదుట.. దాడుల వెనుక సూత్రధారి సజ్జలను అరెస్టు చేయాలట… ఇవీ డొక్కా మాటలు.

నందిగం సురేష్ అరెస్టు అనవసరం అయితే.. ఆ విషయం ఆయన తమ పార్టీనేత చంద్రబాబుకే చెప్పి అలా చేయించవచ్చు కదా. పోలీసులు ఏదో.. తమ పని తాము చేసుకుపోతూ ఉంటే.. నందిగం సురేష్ అరెస్టు మీద మాత్రం సానుభూతి చూపిస్తూ, తనకు కిట్టని వాళ్లందరినీ కేసులో ఇరికించాలని ప్రయత్నం చేస్తూ మాజీ మంత్రి డొక్కా అసలు ఏం మాట్లాడుతున్నారో ఆయనకైనా అర్థమవుతున్నట్టుగా లేదని ప్రజలు అభిప్రాయపడుతున్నారు.