బాబుని పొగుడుతున్న బీజేపీ నేత

బీజేపీ వారు టీడీపీకి మిత్రులే. వారు అంతా కలిసి ఏపీలో ప్రభుత్వాన్ని నడుపుతున్నారు. అయితే బీజేపీలో టీడీపీ నీడ కాకుండా సొంతంగా ఎదగాలని భావించే వర్గం ఒకటి ఉందని ప్రచారంలో ఉంది. అలాగే గత అధ్యక్షుడు కూడా టీడీపీని వైసీపీని కలిపి విమర్శించేవారు.

వారు బీజేపీ శ్రేయస్సు కోసం మాట్లాడినా కూడా వైసీపీ ముద్ర వేసేవారు. ఇపుడు చూస్తే పొత్తుల తరువాత బీజేపీ అంతా టీడీపీతో ప్రయాణించాల్సి వస్తోంది. కేంద్రంలో బీజేపీకి టీడీపీ ఎంపీల మద్దతు కూడా అవసరం కావడంతో బాబు మాటే చలామణీ అవుతోంది. బాబును కాదని ఎవరూ ఏమీ చేయలేని స్థితి.

రేపటి రోజున నామినేటెడ్ పదవులు రావాలన్నా కూడా బాబుతోనే ఉంది అంతా. అందుకే మెల్లగా అందరూ బాబుని పొగడడం మొదలెట్టారు. రాజ్యసభ మాజీ ఎంపీ, సీనియర్ నేత అయిన జీవీఎల్ నరసింహారావు లేటెస్ట్ గా బాబుని పొగిడారు. చంద్రబాబు బెజవాడ వరదల సందర్భంగా పరిస్థితిని అదుపు చేయడంలో పూర్తిగా కష్టపడుతున్నారు అని ఆయన కితాబు ఇచ్చారు.

ఏపీ ప్రభుత్వం వరదల సహాయ చర్యలు బాగా చేపడుతోందని కూడా ఆయన చెప్పారు. చంద్రబాబుని జీవీఎల్ ప్రశంసించడం పట్ల చర్చ అయితే సాగుతోంది. జీవీఎల్ ఇటీవల ఎన్నికల్లో విశాఖ నుంచి ఎంపీగా పోటీ చేయాలనుకున్నారు. కానీ ఆయనకు టికెట్ దక్కలేదు.

ఆయన సీనియర్ నేతగా బీజేపీలో ఉన్నారు. దాంతో ఏ విధంగా చూసుకున్నా ఈ అయిదేళ్లలో రాజ్యసభ ఎంపీ టికెట్ దక్కాలన్నా టీడీపీ మద్దతు తప్పనిసరిగా అవసరం. కేంద్ర బీజేపీ నాయకత్వం కూడా బాబుతోనే అంతా అంటున్నట్లుగానే ఉంది. అందుకే దేనికైనా మంచిదని బాబు జపమే బీజేపీ సీనియర్ నేతలు అంతా చేస్తున్నారు. జీవీఎల్ తాజా వైఖరి కూడా ఆయన భవిష్యత్తు రాజకీయాలకు మేలు చేసేదిగా ఉండేలా చూసుకుంటున్నారు అని అంటున్నారు.